Mynih, 19 shkurt 2022
Kryeministri i Republikës së Kosovës, Albin Kurti, së bashku me zëvendëskryeministren, njëherësh ministre e Punëve të Jashtme dhe Diasporës, Donika Gërvalla, takuan në Mynih, ministren e Punëve të Jashtme të Suedisë, Ann Linde.
Kryeministri Kurti vlerësoi marrëdhëniet shumë të mira dhe ndihmën e madhe të Suedisë për zhvillimin socio-ekonomik të Kosovës.
Lidhur me agjendën evropiane, kryeministri Kurti tha se institucionet dhe vlerat euro-atlantike duhet të jenë të hapura për të gjitha vendet e Ballkanit Perëndimor.
Ai e vlerësoi shumë të rëndësishme përkrahjen e qeverisë suedeze për liberalizimin e vizave për Kosovën dhe shtoi se ky proces nuk mund të shtyhet më tej.
U bisedua edhe për dialogun me Serbinë dhe kryeministri Kurti theksoi rolin konstruktiv dhe gatishmërinë për të vazhduar bisedimet që në qendër kanë njohjen e ndërsjellë.
Ministrja Linde u shpreh e inkurajuar nga indikatorët ekonomik dhe të sundimit të ligjit në vitin e parë të qeverisjes dhe për stabilitetin politik të Kosovës dhe vuri theksin te raportet shumë të mira ndërmjet dy shteteve.
Ajo shprehu mbështetje për dialogun në Bruksel për normalizimin e marrëdhënieve ndërmjet Kosovës dhe Serbisë.
Last modified: 20 Shkurt, 2022