Prishtinë, 07 mars 2009
Kryeministri i Qeverisë së Republikës së Kosovës, Hashim Thaçi, ka marrë pjesë në Akademinë solemne organizuar nga Ministria e Arsimit, Shkencës dhe Teknologjisë , me rastin e 7 marsit, Ditës së Mësuesit. Kanë marrë pjesë ministri Enver Hoxhaj, përfaqësues të institucioneve arsimore të Kosovë, veteranë të arsimit dhe arsimtarë të dalluar.
Në vazhdim po japim të plotë fjalimin e kryeministrit Hashim Thaçi mbajtur në Akademinë solemne me rastin e 7 marsit, Ditës së Mësuesit.
Të nderuar të pranishëm,
Sot është një ditë e shënuar në kalendarin e festave të vendit tonë: dita e arsimtarëve.
Kjo ditë mbartë në vete dy dimensione që në historinë e shkollës shqipe kanë qenë gjithmonë të pandashme : përkushtimin për dije dhe sakrificat për liri dhe shtet të pavarur.
Arsimtarët e Kosovës, nga gjenerata në gjeneratë, kanë qenë në ballë të lëvizjeve tona njëshekullore për çlirim dhe përparim.
Historia e rrugëtimit tonë drejt lirisë nuk mund të ketë kuptim pa kontributin e arsimtarëve kosovar.
Ju mbajtët gjallë frymën e rezistencës atëherë kur populli ynë përballej me politikën sistematike të aparteidit.
Ju ishit aty kur populli ynë u ngrit në luftë të armatosur për ti dhënë fund kësaj politike.
Dhe përsëri në ditët e para të lirisë Ju ishit aty ku po fillonte rindërtimi i jetës dhe vendit.
Të nderuar të pranishëm,
Sot Kosova është shtet i pavarur dhe sovran, i ndërtuar mbi parimet dhe vlerat e demokracisë.
Detyrat e mëdha të konsolidimit të shtetit dhe zhvillimit ekonomik i kemi përpara. Në këtë rrugëtim ne kemi vetëm një alternativë, alternativën e suksesit.
Këto sfida të mëdha kërkojnë përkushtim dhe dije. Kjo vjen nga zhvillimi i një sistemi të edukimit cilësor në të gjitha nivelet e tij.
Duke qenë të vetëdijshëm për këtë fakt qeveria ime që në ditët e para të saj e ka bërë arsimin një nga prioritetet më të rëndësishme të punës së saj.
Ne nuk humbëm kohë dhe filluam menjëherë punën në modernizimin e infrastrukturës shkollore dhe përmirësimin e stimulimit financiar për arsimtarët tanë duke ngritur pagat e Juaja.
Sot imazhet e Kosovës me shkollat kontejner janë zhdukur.
Nxënësit janë të lumtur sepse po edukohen në shkolla të modernizuara, e arsimtarët si kurrë më parë ndjehen më të motivuar për punën që e bëjnë.
Ne po ia kthejmë dinjitetin profesionit të arsimtarit.
Ne nuk do të ndalemi më kaq.
Investimi ynë në edukim do të vazhdoj, në të gjitha nivelet e tij, sepse investimi në edukim është investimi për të ardhmen tonë si shtet dhe shoqëri.
Kjo e ardhme ka vetëm një kuptim : integrimin euro-atlantik të vendit tonë.
Një nga standardet themelore të këtij integrimi është zhvillimi ekonomik, i cili në kushtet bashkëkohore bazohet mbi dijen dhe edukimin cilësor.
Prandaj, të nderuar të pranishëm, nëse dje arsimi ishte shtyllë e rezistencës sonë për liri, sot është shtyllë e integrimit të vendit tonë në familjen e demokracive të zhvilluara.
Duke iu uruar të gjithë arsimtarëve të Kosovës ditën e 7 marsit dua të ri theksoj përkushtimin tim dhe Qeverisë që drejtoj për zhvillimin e arsimit.
Me rastin e 7 marsit, Ministria e Arsimit, Shkencës dhe Teknologjisë dhe shkolla fillore “Hasan Prishtina “ nga Prishtina kanë hapur një ekspozitë me fotografi në të cilën është prezantuar rruga e arsimit në Kosovë në periudha të ndryshme kohore .
Sot Kryeministri i Qeverisë së Republikës së Kosovës, Hashim Thaçi dhe ministri i Arsimit, Enver Hoxhaj përuruan shkollën e re në lagjen “ Tusus “ në Prizren.
Last modified: 7 Mars, 2009