Prishtinë, 9 qershor 2023
Nën drejtimin e zëvendëskryeministres së Republikës së Kosovës për Çështje të Pakicave dhe Drejtat e Njeriut, Emilija Rexhepi, u mbajt takimi i radhës i Grupit Koordinues Ndërinstitucional për të Drejtat e Njeriut në Republikën e Kosovës.
Në fjalën e saj, ajo theksoi se Qeveria e Republikës së Kosovës vazhdon të angazhohet për vendosjen e të drejtave të njeriut në qendër të vlerave që paraqet Kosova, siç janë demokracia, sundimi i ligjit, mosdiskriminimi, barazia gjinore, bashkëjetesa paqësore dhe respekti reciprok ndaj grupeve të ndryshme të popullsisë me përkatësi të ndryshme fetare, gjuhësore, etnike dhe kulturore.
Ajo theksoi se është e rëndësishme që synimet tona sot të përcillen në veprimtari institucionale të përditshme për mbrojtjen dhe luftën kundër diskriminimit në të gjitha sferat e jetës së qytetarëve. Ajo vuri në dukje se është arritur përparim në hartimin dhe zbatimin e ligjeve dhe politikave në fushën e të drejtave të njeriut, me një fokus të veçantë në qasjen në drejtësi për të gjithë dhe ndërtimin e institucioneve të bazuar në parimet e mirëqeverisjes në të gjitha nivelet.
Zëvendëskryeministrja theksoi rëndësinë e prioritetit të zbatimit të rekomandimeve të mekanizmave ndërkombëtarë, rajonalë dhe vendorë për të drejtat e njeriut, si dhe rekomandimeve të Avokatit të Popullit. Ajo gjithashtu theksoi rëndësinë e forcimit të sistemit kombëtar për mbrojtjen dhe avancimin e të drejtave të njeriut, ofrimin e mundësive të barabarta dhe mbrojtjen nga diskriminimi, si dhe krijimin dhe forcimin e sistemit të trajnimit për të drejtat e njeriut dhe edukimit të vazhdueshëm të qytetarëve.
Ajo veçanërisht theksoi rëndësinë e edukimit brenda familjes, sistemit arsimor, medias dhe rrjeteve sociale në ngritjen e ndërgjegjësimit të qytetarëve. Ajo shprehu shqetësimin për praninë e urrejtjes së madhe në fjalorin e të rinjve në rrjetet sociale dhe theksoi nevojën për arsimimin e të rinjve përmes programeve të dialogut ndëretnik, për të njohur me kulturat, gjuhët, traditat dhe zakonet e popujve të ndryshëm që jetojnë në Kosovë.
Zëvendëskryeministrja përfundoi se Qeveria do të vazhdojë të bashkëpunojë fort me organizatat e shoqërisë civile për të vendosur standardet më të larta të të drejtave të njeriut në Republikën e Kosovës.
Në konferencë ishin të pranishëm, ministri për Komunitete dhe Kthim, Nenad Rashiq, Avokati i Popullit, Naim Qelaj, Zëvendësministrja e Kulturës, Rinisë dhe Sportit, Daulina Osmani, Zëvendësministrja e Arsimit, Shkencës, Teknologjisë dhe Inovacionit, Edona Maloku Bërdyna, drejtor i Zyrës për Qeverisje të Mirë, Habit Hajredini, përfaqësues nga Zyra e Bashkimit Evropian në Kosovë, si dhe përfaqësues të organizatave të shoqërisë civile.
Last modified: 9 Qershor, 2023