Prishtinë, 28 shtator 2008
Zonja dhe zotërinj
Kalendari i historisë sonë të re është i pasur me data të rëndësishme.
Është i lavdishëm ashtu siç qenë të rëndësishme ngjarjet me karakter të qëndresës qytetare dhe çlirimtare.
Është i ndritshëm dhe madhështor ashtu siç qenë ata që lanë gjurmë të thella duke bërë kthesa historike.
Ferizaj me rrethinë gjithmonë ka qenë vatër e rezistencës.
Vend prej nga kanë dalë atdhetarë e veprimtarë të devotshëm në të gjitha periudhat historike, veçanërisht prej viti 1981 e deri tek lufta e lavdishme e Ushtrisë Çlirimtare të Kosovës.
Zonja e zotërinj,
Sot kur Ju shënoni Ditën e Dëshmorëve, nuk ka si të mos ndjehemi së bashku krenarë dhe ballëhapur përballë emrit dhe veprës së dëshmorëve.
Shënohet dita e tyre për herë të parë në Kosovën e Lirë, të Pavarur, Sovrane dhe Demokratike.
Shënohet dita e Dëshmorëve në Ferizajn që po merr çdo ditë e më shumë fizionominë e një qyteti me tipare urbane, me një rrethinë e cila nga dita në ditë është duke ecur me hapa të dukshëm përpara.
Simbolikisht në vitin e parë të pavarësisë, në Ditën e Dëshmorëve të Ferizajt do të përurohet rruga e asfaltuar e Jezercit.
Vend në të cilin u rezistua në ditët e vështira.
Vend në të cilin investohet në ditët e mira.
Investimi në rrugë, në shkolla, në përmirësimin e jetës së qytetarëve tanë është mesazhi më i mirë i respektit për ata që flijuan jetën për lirinë e vendit tonë.
Qeveria e sotme e Kosovës është e përkushtuar jetësisht që të punojë me përgjegjësi të lartë, sepse qytetarët ia dhanë besimin e shtetkrijimit.
Qeveria e Republikës së Kosovës me këmbëngulësi është duke e vënë çdo cent të buxhetit të saj në projektet me interes të veçantë për përmirësimin e infrastrukturës, ndërtimin e shkollave, ndërtimin e rrugëve dhe krijimin e një baze për ekonominë e vogël dhe të mesme.
Zonja dhe zotërinj,
Ne jemi duke punuar çdo ditë me përgjegjësi të lartë politike që qytetarët ta ndiejnë dorën e pushtetit të tyre, që të jenë krenarë dhe dinjitoz me punën e institucioneve të zgjedhura nga vullneti i tyre.
Qeveria e Republikës së Kosovës është shumë e vendosur në luftën kundër korrupsionit, krimit të organizuar dhe të gjitha dukurive negative që ngulfatin zhvillimin e vendit dhe zbehin imazhin e Kosovës në botë.
Duke ndërtuar një shtet të fortë ligjor, në baza të shëndosha, me perspektivë euroatlantike, ne arsyetojmë besimin e qytetarëve tanë.
Duke ndërtuar një shtet stabil, me politikë paqësore, arsyetojmë ndihmën e miqve tanë që na ndihmuan në të kaluarën e afërt, që po na ndihmojnë edhe sot në forcimin e pavarësisë së shtetit tonë.
Vetëm duke ndërtuar një shtet funksional, që në qendër të vëmendjes ka jetën e qytetarit, do të jemi ballëlartë para dëshmorëve, para të gjitha kategorive sociale që kanë kontribuar me gjak dhe djersë për lirinë e Kosovës.
Duke shprehur respekt të veçantë për familjet e dëshmorëve, invalidët e luftës dhe veteranët, institucioneve të komunës suaj u garantojmë se do të gëzojnë mbështetje të gjerë nga pushteti qendror, në të gjitha fushat, me besim që do t’i implementojnë projektet zhvillimore për Ferizajn me rrethinë.
Lavdi Dëshmorëve
Last modified: 28 Shtator, 2008