Prishtinë, 3 nëntor 2023
Kryeministri i Republikës së Kosovës, Albin Kurti, mori pjesë sot në ceremoninë e certifikimit të kursantëve holandez, në ambientet e Qendrës së Kërkim Shpëtimit të Forcës së Sigurisë së Kosovës në Pomozotin, Fushë Kosovë, ku të pranishëm ishin edhe ministri i Mbrojtjes, Ejup Maqedonci, Komandanti i FSK-së, Gjenerallejtënant Bashkim Jashari, zëvendësministri i Mbrojtjes, Shemsi Syla, zëvendësambasadori i Holandës në Kosovë, Ronald Goldberg, Komandanti i Gardës Kombëtare të FSK-së, Gjeneral brigade Naim Haziri dhe Drejtori i Qendrës së Kërkim Shpëtimit, John Doone.
Në hapje të kësaj ngjarjeje të rëndësishme, Kryeministri Kurti theksoi se trajnimi që sapo ka përfunduar është pjesë e një rrjeti global aktivitetesh që na mundësojnë t’i përgjigjemi me shpejtësi të papriturave dhe, duke e bërë këtë, të shpëtojmë jetë.
Teksa i uroi kursantët për këtë arritje, siç është kjo e certifikimit, Kryeministri Kurti u shpreh i lumtur që ishte pjesë e kësaj ngjarjeje në festimin e kësaj arritjeje të rëndësishme për të gjithë pjesëmarrësit dhe për të gjithë stafin që ndihmoi që ky ushtrim të realizohet me sukses të plotë.
Në fjalën e tij Kryeministri Kurti tha se përkushtimi i Kosovës për partneritet dhe vendosmëria e saj për të kontribuar në zgjidhjet e përbashkëta është thelbësore. Ai shtoi se është krenar për aftësitë e klasit botëror që i zhvillojmë në Pomozotin, aftësi që janë jetike për shtetin tonë dhe partnerët tanë teksa përgatitemi për role që na takojnë në arenën globale.
Duke e cilësuar këtë si një moment shumë të veçantë, Kryeministri Kurti tha se kjo qendër, vitin e kaluar, ka ofruar trajnime për afër 3 mijë persona, në mesin e të cilëve krahas shtetasve tanë edhe qindra partnerë tjerë të huaj nga Shqipëria, Britania e Madhe, Italia, Hungaria, Jordania, Malta, Maqedonia e Veriut, Irlanda e Veriut, Portugalia, Turqia si dhe kolegët tjerë të nderuar nga Holanda.
“Ambicia jonë është ta ngrisim këtë qendër në një Qendër të njohur Ekselence, duke i shërbyer partnerëve tanë të Bashkimit Evropian dhe NATO-s, si dhe komunitetit më të gjerë global”, tha Kryeministri Kurti.
Në këtë ceremoni Kurti e lartësoi punën heroike të anëtarëve të ekipit të Kërkim Shpëtimit të Republikës së Kosovës, sepse ata ishin ndër të parët që iu përgjigjën tërmetit shkatërrues në Turqi në fillim të këtij viti, bashkë me kolegët e tyre nga Holanda dhe Mbretëria e Bashkuar që ndodhen sot në këtë sallë.
Në përmbyllje të fjalës së tij, Kryeministri Kurti u shpreh krenar që po i mirëpret partnerët në Qendrën e Kërkim Shpëtimit të FSK-së në Pomozotin dhe tha se pret që të vazhdojmë bashkëpunimin produktiv edhe në të ardhmen.
Fjala e plotë e kryeministrit Kurti:
I nderuar Ejup Maqedonci, Ministër i Mbrojtjes i Republikës së Kosovës,
I nderuar gjenerallejtënant, Bashkim Jashari, Komandant i Forcës së Sigurisë së Kosovës,
I nderuari z.Shemsi Syla, zëvendësministër i Mbrojtjes,
I nderuar Z. Ronald Goldberg, Zëvendës Ambasador i Holandës,
I nderuari gjeneral brigade Naim Haziri, Komandant i Gardës Kombëtare të Forcave të Sigurisë së Kosovës,
I nderuar z. John Doone, Drejtor i Qendrës së Trajnimit për Shpëtim Kërkimor të Forcave të Sigurisë së Kosovës
Të nderuar të ftuar,
Zonja dhe zotërinj,
Është një kënaqësi e madhe që jam këtu me ju sot në përfundim të këtij aktiviteti të rëndësishëm. Urime për të gjithë pjesëmarrësit dhe për të gjithë stafin që ndihmoi këtë ushtrim të suksesshëm.
Askush nuk e di më mirë se të pranishmit në këtë dhomë se ne jetojmë në një botë me pasiguri të madhe. Ngjarja e përbashkët e trajnimit që sapo ka përfunduar është pjesë e një rrjeti global aktivitetesh që na mundësojnë t’i përgjigjemi me shpejtësi të papriturave dhe, duke e bërë këtë, të shpëtojmë jetë.
Përkushtimi i Kosovës për partneritet dhe vendosmëria jonë për të kontribuar në zgjidhjet e përbashkëta është thelbësore. Jam jashtëzakonisht krenar për aftësitë e klasit botëror që po ushqejmë këtu në Pomozatin. Këto aftësi janë jetike për kombin tonë dhe për partnerët tanë të shumtë, ndërsa përgatitemi për rolet që duhet të luajmë në arenën globale.
Gjatë vitit të kaluar, kjo qendër ka ofruar trajnime për afro 3000 individë, duke përfshirë shtetasit tanë dhe qindra partnerë të huaj nga Shqipëria, Britania e Madhe, Italia, Hungaria, Jordania, Malta, Maqedonia e Veriut, Irlanda e Veriut, Portugalia, Turqia dhe, sigurisht, kolegët tanë të nderuar nga Holanda. Zoti Zëvendës Ambasador, ky është një moment i veçantë që e ndajmë së bashku.
Ndërsa vazhdojmë të zgjerojmë aftësitë tona, ambicia jonë është ta ngrisim këtë qendër në një Qendër të njohur Ekselence, duke i shërbyer partnerëve tanë të Bashkimit Evropian dhe NATO-s, si dhe komunitetit më të gjerë global. Përparimi që kemi bërë në këtë përpjekje është i dukshëm dhe ne mezi presim t’ju mirëpresim përsëri në të ardhmen
Më duhet të theksoj punën heroike të anëtarëve të ekipit tonë të Kërkimit dhe Shpëtimit. Ata ishin ndër të parët ndërkombëtarë që iu përgjigjën tërmetit shkatërrues në Türkiye në fillim të këtij viti, siç ishin shumë kolegë tanë nga Holanda dhe Mbretëria e Bashkuar të pranishëm në këtë dhomë.
Qëllimi ynë kryesor strategjik është të përparojmë drejt dhe të realizojmë vizionin tonë euroatlantik. Bërja anëtare e Bashkimit Evropian dhe e aleancës së NATO-s është thelbësore për aspiratat tona.
Qendra ku jemi tani është një shembull i mrekullueshëm dhe i prekshëm se kush jemi, çfarë përfaqësojmë si dhe përkushtimin tonë të qëndrueshëm.
Jemi krenarë që ju mirëpresim dhe presim të vazhdojmë këtë bashkëpunim produktiv edhe në të ardhmen.
Faleminderit!
Last modified: 6 Nëntor, 2023