Prishtinë, 5 mars 2010
Fjala e kryeministrit të Republikës së Kosovës, Hashim Thaçi në manifestimin e organizuar me rastin e shënimit të 12 vjetorit të Epopesë së UÇK-së
I nderuar President Sejdiu,
I nderuar Kryetar i Kuvendit, z. Krasniqi
Të nderuara familje të dëshmorëve
E nderuara familje Jashari,
Epopeja e Ushtrisë Çlirimtare të Kosovës është rezistenca më vigane, më origjinale dhe e papërsëritshme në historinë e çlirimit të një kombi.
Sakrifica e Komandantit legjendar Adem Jashari është akti sublimues i gjithë përpjekjeve dhe sakrificave shekullore për lirinë e Kosovës.
Është kryevepër e Ushtrisë Çlirimtare të Kosovës.
Epopeja e 5, 6 dhe 7 marsit 1998 është historia moderne e lirisë sonë.
Zonja dhe zotërinj,
Dymbëdhjetë vjet pas Epopesë së Komandantit Legjendar Adem Jashari, Kosova ka hyrë në vitin e 11 të lirisë, në vitin e tretë të pavarësisë, gjithnjë e sigurt dhe e vendosur për të qenë pjesë e botës euroatlantike.
Pjesë e botës për të cilën ëndërruan ata që na sollën në ditët e sotme.
Çdo vit që kalon i thellon themelet e lirisë së Kosovës.
Rrit dhe zgjeron perspektivën euroatlantike të saj.
Çdo vit që kalon rrit madhështinë e sakrificës madhore për lirinë e vendit tonë, thellon peshën historike të kujtesës sonë rrit krenarinë e brezave tanë dhe të pasardhësve tanë.
Ata janë në themelet e ëndrrave tona.
Në fytyrën e qeshur dhe të shëndetshme të fëmijëve tanë.
Në hapjen e një shkolle të re.
Janë në ëndrrat dhe lumturinë e të rinjve tanë.
Në mundin dhe djersën e punës së fermerëve, minatorëve, mjekëve, pedagogëve dhe inxhinierëve.
Jeni në nderin e ushtarëve dhe policëve.
Në krenarinë e fëmijëve dhe familjeve të dëshmorëve.
Janë në bujarinë e nënave, në rehatinë e veteranëve dhe pensionistëve.
Janë në paragrafët e Kushtetutës së Republikës së Kosovës.
Në tingujt e himnit dhe në të gjitha themelet e institucioneve të shtetit të ri të Kosovës.
Ata janë në themelet e së shkuarës dhe në horizontet e ardhmërisë.
Prandaj Kosova, institucionet dhe qytetarët e saj përkulemi para tyre.
Lavdi Komandantit Legjendar Adem Jashari!
Lavdi Dëshmorëve!
Last modified: 5 Mars, 2010