Prishtinë, 4 dhjetor 2014
Zëvendëskryeministrja e Republikës së Kosovës, Edita Tahiri ka pritur në takim z. Ola Svenningsson, Shef i Divizionit për Zgjerimin e BE-së dhe Evropën Juglindore të ministrisë së Punëve të Jashtme të Suedisë dhe znj. Helena Alvin, Udhëheqëse e deskut të këtij divizioni të cilët shoqëroheshin nga Ambasadori i Suedisë për Kosovë, z. Mats Staffansson dhe z. Henrik Nilsson, Ministër këshilltar në Ambasadën e Suedisë në Prishtinë.
Zëvendëskryeministrja Tahiri në këtë takim vlerësoi lartë marrëdhëniet dypalëshe në mes Kosovës dhe Suedisë dhe përkrahjen e vazhdueshme që janë duke e bërë për zhvillimin e shtetit të Kosovës. Ajo foli reformat euro-atlantike që janë duke u ndërmarrë duke i konsideruar si vlera të përbashkëta perëndimore siç janë ato në fushën e zhvillimit të demokracisë, sundimit të rendit dhe ligjit, zhvillimin ekonomik dhe atë sigurisë.
Zëvendëskryeministrja Tahiri kërkoi mbështetjen e Suedisë për përshpejtimin e integrimeve evropiane për Kosovën duke vlerësuar lartë përfundimin e negociatave për Marrëveshjen Stabilizim Asocim me Bashkimin Evropian, por theksoi se qytetarët e Kosovës mbeten ende të privuar nga e drejta për të lëvizur lirë në Evropë, andaj kërkoi mbështetje për liberalizimin e vizave.
“Republika e Kosovës si shtet i pavarur tashmë është duke luajtur rol të rëndësishëm si faktor paqeje dhe promovimi të fqinjësisë duke theksuar faktin se Qeveria e Kosovës ka kryer të obligimet nga dialogu i Brukselit ndërsa theksoi se Serbisë i mungon vullneti politike për fqinëesi të mirë duke marrë parasysh tendencat për zvarritjen e zbatimit të marrëveshjeve nga Dilaogu i Brukselit, të garantuara nga BE-ja”, theksoi zëvendëskryeministrja Tahiri.
Nga ana e tij, Ola Svenningsson, Shef i Divizionit për Zgjerimin e BE-së dhe Evropën Juglindore të ministrisë së Punëve të Jashtme të Suedisë, ka rikonfirmuar mbështetjen e Suedisë për Kosovën në të gjitha planet si dhe dakordimin për thellimin e marrëdhënieve mes dy vendeve në të gjitha fushat e interesit të ndërsjellë, me theks në bashkëpunimin ekonomik, vazhdimin e përkrahjes së shtetit suedez përmes Strategjisë për Zhvillim dhe Bashkëpunim me Kosovën 2014-2020, si dhe për mbështetjen për integrimet euro-atlantike për Kosovën.
“Suedia i jep mbështetje të fuqishme procesit euro integrues të Kosovës drejt Bashkimit Evropian si dhe në zbatimin e plotë të marrëveshjeve të Brukselit si një mundësi e mirë për të promovuar paqen, stabilitetin dhe bashkëpunimin rajonal në Ballkanin perëndimor”, theksoi z. Svenningsson.
Last modified: 4 Dhjetor, 2014