Prishtinë, 15 maj 2023
Me ftesë të Kryeministrit të Republikës së Kosovës, Albin Kurti, sot u organizua një pritje për të shënuar shpërblimin me çmim vjetor nga Bashkimi Evropian për integrimin e komuniteteve rome në Ballkanin Perëndimor dhe Turqi të Zyrës për Qeverisje të Mirë, ku krahas Organizatës për Stabilitet Socio-Ekonomik që gjithashtu ishte shpërblyer nga BE-ja për punë me komunitet, të pranishëm ishin edhe zëvendëskryeministrja Emilija Redžepi, ambasadorë të akredituar, deputeti nga radhët e komunitetit jo shumicë Erxhan Galushi, udhëheqës të organizatave ndërkombëtare e drejtues të organizatave të shoqërisë civile.
“Komunitetet dhe diversiteti janë pasuri për Kosovën, por ne i dimë sfidat që ekzistojnë për bashkëqytetarët tonë romë, ashkali dhe egjiptianë. Jemi të përkushtuar që së bashku me shoqërinë civile dhe partnerët ndërkombëtarë do t’i tejkalojmë këto sfida për realizimin e plotë të të drejtave të komuniteteve. Në veçanti, jam i lumtur për Strategjinë për avancimin e të drejtave të komuniteteve rom dhe ashkali, të cilën qeveria jonë e miratoi vitin e kaluar. Falë punës së përkushtuar të Zyrës për Qeverisje të Mirë, ka më shumë gjasa të realizohet kjo Strategji për shkak të ndarjes së buxhetit për të gjitha aktivitetet – gjë që nuk është bërë deri më tani”, tha kryeministri Kurti.
Kryeministri tha me këtë rast se në këtë iniciativë të Qeverisë, fokus të veçantë i kemi kushtuar gjuhës kundër urrejtjes dhe diskriminimit, dhe me hapjen e platformës ëëë.raportodiskriminimin.org kemi dëshmuar përkushtimin e qeverisë për monitorimin e rasteve të diskriminimit dhe zgjidhjen e tyre.
Po ashtu, kryeministri tha se këtë vit kemi ndarë edhe bursa për nxënës nga komuniteti rom, ashkali dhe egjiptian dhe 200 mijë euro për qendrat arsimore ku mësojnë fëmijët e këtyre komuniteteve.
Duke theksuar punësimin si një prej sfidave kryesore, për komunitetin rom, ashkali dhe egjiptian, kryeministri Kurti tha se për këtë kemi krijuar ekipin ndërinstitucional për promovimin e punësimit të komuniteteve rom, ashkali dhe egjiptian dhe i jemi mirënjohës drejtorit Habit Hajredinit dhe ekipit të tij për funksionalizimin e këtij mekanizmi.
“Ne kemi shënuar suksese me numrin e romëve, ashkalive dhe egjiptianëve që kanë përfituar nga trajnimi në Qendrat e Trajnimit Profesional; vitin e kaluar 104 romë, ashkali dhe egjiptianë përfituan nga ky trajnim – një rritje nga vetëm 34 një vit më parë. Po ashtu jemi të lumtur krahas raundin paraprak të rekrutimit kur vetëm një pjesëtar i komuniteteve rom, ashkali dhe egjiptian është pranuar si polic, prej rekrutimit të fundit kemi progres, me 3 gra dhe 6 burra nga këto komunitete”, shtoi kryeministri Kurti.
Drejtori i Zyrës për Qeverisje të Mirë në kuadër të Zyrës së Kryeministrit, Habit Hajredini, në fund të muajit të kaluar u shpërblye me çmim nga Komisioni Evropian për Integrimin e Romëve në Ballkanin Perëndimor dhe Turqi. Ky është çmimi i parë që i kushtohet një zyrtari të lartë si nëpunës civil në Qeverinë e Republikës së Kosovës.
Z. Hajredini koordinon punën e qeverisë për komunitetet romë, ashkali dhe egjiptianë. Disa prej angazhimeve më të shënuara të viteve të fundit përfshijnë kontributin e tij në hartimin e Strategjisë për Avancimin e të Drejtave të Romëve dhe Ashkalive, krijimin e platformës për raportimin e diskriminimit ndaj romëve, www.raportodiskriminim.org dhe hapjen e mini-bibliotekën në gjuhën rome që u inauguruar nga Kryeministri muajin e kaluar.
Fjala e plotë e kryeministrit:
E nderuara zëvendëskryeministre e Republikës së Kosovës, znj. Emilia Rexhepi,
I nderuar Ambasador, shef i misionit të BE-së në Kosovë, Tomas Szunyog,
I nderuar Ambasador i Republikës Federale të Gjermanisë, z. Jörn Rohde,
E nderuara shefe e UNICEF-it, Nona Zicherman,
I nderuar drejtor i Roma Active Albania, Z. Adriatik Hasantari,
I nderuar deputet në Zyrën e Këshillit të Evropës, z. Tankut Soykan,
I nderuari deputet në Kuvendin e Republikës z. Erxhan Galushi,
Të nderuar staf të Zyrës për Qeverisje të Mirë në Zyrën e Kryeministrit dhe nga institucionet tjera të Republikës,
I nderuari ambasador, shef i OSBE-së në Kosovë z. Michael Dvenport,
Të nderuar përfaqësues të Organizatës për Stabilitet Social-Ekonomik dhe përfaqësues të tjerë të shoqërisë civile,
Të nderuar partnerë ndërkombëtarë,
Zonja dhe zotërinj
Që nga viti 2014, Bashkimi Evropian ka ndarë një çmim vjetor për integrimin e komuniteteve rome në Ballkanin Perëndimor. Ky çmim asnjëherë nuk është ndarë për një nëpunës civilë prandaj jemi shumë të gëzuar që për herë të parë, pikërisht tek ne po ndodh në Qeverinë e Republikës së Kosovës dhe është një kënaqësi dhe nder i veçantë të marrë pjesë në një ngjarje si kjo.
Bashkë me partnerët tanë në këtë ceremoni po e shënojmë edhe punën e Zyrës për Qeverisje të mirë në kuadër të Zyrës së Kryeministrit por njëkohësisht edhe punën e Organizatës Kosovare për Stabilitet Social dhe Ekonomik.
Komunitetet dhe diversiteti janë pasuri për Kosovën, por ne i dimë sfidat që ekzistojnë për bashkëqytetarët tonë romë, ashkali dhe egjiptianë. Jemi të përkushtuar që së bashku me shoqërinë civile dhe partnerët ndërkombëtarë t’i tejkalojmë këto sfida për realizimin e plotë të të gjitha të drejtave të komuniteteve. Në veçanti, jam i lumtur për Strategjinë për avancimin e të drejtave të komuniteteve rom dhe ashkali, të cilën qeveria jonë e miratoi në vitin e kaluar. Falë punës së përkushtuar të Zyrës për Qeverisje të Mirë, gjasat për realizimin e kësaj Strategjie janë të mëdha meqenëse është ndarë buxhet për të gjitha aktivitetet, gjë që nuk është bërë deri më tani.
Gjithashtu, ne këtë iniciativë të Qeverisë, e kemi bërë të tillë që fokus të veçantë e ka luftimin e gjuhës së urrejtjes dhe diskriminimit. Me hapjen e platformës www.raportodiskriminimin.org kemi dëshmuar përkushtimin e qeverisë për monitorimin e rasteve të diskriminimit dhe zgjidhjen e tyre.
Kemi ndarë si Qeveri e Republikës 500 bursa për nxënësit nga komuniteti rom, ashkali dhe egjiptian dhe 200 mijë euro për qendrat arsimore të këtyre komuniteteve. Jemi duke adresuar edhe dukshmërinë e martesave të hershme që shkurtojnë arsimimin e shumë vajzave në komunitet, dhe po planifikojmë disa forma bashkëpunimi në nivel komunal për ta trajtuar këtë fenomen të dëmshëm.
Ne e kuptojmë rëndësinë e regjistrimit të komuniteteve gjatë procesit të regjistrimit e popullsisë i cili do të fillojë në shtator të këtij viti, dhe Agjencia e Statistikave po punon ngushtë me përfaqësuesit e komuniteteve për të siguruar përfaqësim sa më real të komuniteteve në regjistrimin e tyre.
Punësimi është një sfidë kryesore për komunitetin rom, ashkali dhe egjiptian. Për këtë kemi krijuar ekipin ndërinstitucional për promovimin e punësimit të komuniteteve rom, ashkali dhe egjiptian dhe i jam mirënjohës drejtorit Habit Hajredini dhe ekipit të tij për funksionalizimin e këtij mekanizmi. Ne kemi shënuar sukses me rritjen e numrit të romëve, ashkalive dhe egjiptianëve të cilët kanë përfituar nga trajnimi në Qendrat e Trajnimit Profesional; vitin e kaluar 104 romë, ashkali dhe egjiptianë përfituan nga ky trajnim – nga vetëm 34 sosh sa ishin një vit më parë. Po ashtu lajm pozitiv është se krahas raundit paraprak të rekrutimit ku vetëm një pjesëtar i komuniteteve rom, ashkali dhe egjiptian është pranuar si polic, në rekrutimin e fundit kemi progres, janë pranuar 3 gra dhe 6 burra nga këto komunitete.
Por jo vetëm Qeveria, është edhe shoqëria civile që ka kontribuar në këtë drejtim që rast e falënderoj në veçanti Organizatën për Stabilitet Social-Ekonomik për punën dhe angazhimin e tyre, me theks të veçantë tek gratë dhe vajzat, të cilat po kontribuojnë në fuqizimin e komuniteteve rom, ashkali dhe egjiptian, kështu që çmimi i dhënë sot është më se i merituar.
Ju uroj të gjithëve për kontributin e përbashkët për të mirën e komuniteteve në Kosovë. Ne e dimë që kemi shumë punë përpara sepse kemi shumë sfida në të tashmen dhe së bashku e dimë që mund të arrijmë më të mirën për një shoqëri me mundësi për të gjithë, pa diskriminim dhe që nuk e lë asnjeri mbrapa.
Ju faleminderit e urime edhe njëherë.
Last modified: 15 Maj, 2023