Prishtinë, 4 shtator 2024
Kryeministri i Republikës së Kosovës, Albin Kurti, i shoqëruar nga ministri i Punëve të Brendshme, Xhelal Sveçla dhe Drejtori i Përgjithshëm i Policisë së Kosovës, Gazmend Hoxha, mori pjesë në njërën nga aktivitetet e organizuara nga Policia e Kosovës në shënim të 25-vjetorit të themelimit të saj.
Në sheshin “Zahir Pajaziti”, ku u mbajt një nga aktivitetet hapëse të këtij përvjetori, kryeministri u mirëprit dhe bashkëbisedoi me fëmijë të grupmoshave të ndryshme të interesuar për të mësuar më shumë rreth Policisë së Kosovës dhe punës që ajo bën.
Duke parë entuziazmin e fëmijëve dhe admirimin e tyre për profesionin e policit, kryeministri u shpreh se do të kujdesemi që të gjithë ata që kanë dëshirën, vullnetin dhe përgatitjen e duhur të mund të bëhen policë në të ardhmen, në mënyrë që të shërbejnë dhe të kontribuojnë në garantimin e sigurisë dhe sundimit të ligjit.
Bashkë me urimin për fillimin e vitit të ri shkollor dhe 25-vjetorit të Policisë, kryeministri u bëri thirrje fëmijëve të pranishëm që të mësojnë sa më shumë e sa më mirë sepse janë edhe e tashmja edhe e ardhmja e vendit.
Last modified: 4 Shtator, 2024