Prishtinë, 13 Dhjetor, 2023
Kryeministri i Republikës se Kosovës, Albin Kurti, ishte i ftuar në pritjen e organizuar nga Ambasada e Suedisë në Kosovë, në shënim të ditës së Shën Luçisë.
“Është inkurajuese kur diplomacia shtrihet përtej mureve të zyrave tona dhe na bashkon për të festuar traditat e dashura të miqve tanë në Kosovë.” tha kryeministri në fjalën e tij.
Me rastin e kësaj feste, ai theksoi rëndësinë e reflektimit mbi rrëfimet që na kujtojnë fuqinë e qëndrueshme të dhembshurisë dhe forcën e shpirtit njerëzor. Kryeministri Kurti tha se këto histori, si ajo e Shën Luçias, le të shërbejnë si frymëzim për të gjithë, për të ofruar kujdes dhe solidaritet për të tjerët pranë nesh.
Ai i uroi të pranishmit, popullin suedez dhe të gjithë ata që e festojnë, ditën e Shën Luçisë.
Fjala e plotë e kryeministrit Kurti:
Shkëlqesia Juaj, Jonas Westerlund, ambasador i Suedisë në Kosovë,
Shkëlqesi ambasadorë dhe anëtarë të tjerë të trupit diplomatik,
Ministrat e Qeverisë, deputetët e Kuvendit,
Përfaqësues të akademisë dhe organizatave të shoqërisë civile,
Të nderuar të ftuar, zonja dhe zotërinj,
Është kënaqësi të jem me ju sot dhe të shoh shumë prej jush përpara se të niseni për pushime. Është po aq inkurajuese kur diplomacia shtrihet përtej mureve të zyrave dhe na bashkon për të kremtuar traditat e dashura të miqve tanë në Kosovë.
Ndërsa e gjejmë veten në ditët më të shkurtra të vitit, traditat bëhen fener ndriçimi dhe ngrohtësie. Ne, qeniet njerëzore, jo vetëm që kënaqemi në verën e gjatë, fjalë për fjalë dhe metaforikisht, por bashkohemi edhe në rrethana më pak të rehatshme, duke gjetur kuptimin dhe duke ndarë përvojat ndërsa ecim përpara drejt Vitit të Ri. Festimi i Lucias, në veçanti, përmbledh thelbin e ndriçimit të ditëve tona më të zymta.
Në mes të lundrimit nëpër dritën e pakët të ditës, simbolika e ‘bartësit të dritës’ merr një rëndësi të thellë. Kjo festë na bën thirrje jo vetëm të shënojmë kalimin e kohës, por të përhapim në mënyrë aktive dritën dhe mirësinë përmes këngëve dhe tregimeve. Megjithatë, përtej brohoritjes festive, kjo festë rezonon thellë me njerëzimin tonë të përbashkët, duke na çuar përsëri në legjendat e Shën Luçisë.
Sipas përrallës, Shën Luçia u siguronte fshehurazi ushqim të krishterëve të persekutuar në katakombet romake. Në shekullin e 4-të, përdorimi i qirinjve të vendosur në një kurorë në kokë i ndriçoi rrugën e saj, duke i liruar të dy duart për detyrën e saj të shenjtë. Ky akt u bë simbol i përkushtimit të saj për të ndihmuar ata në nevojë.
Ndërsa festojmë gëzimin e kësaj stine, le jo vetëm të përqafojmë traditën, por edhe të reflektojmë mbi tregimet që na kujtojnë fuqinë e qëndrueshme të dhembshurisë dhe forcën e shpirtit njerëzor. Le të shërbejnë këto histori si një frymëzim për secilin prej nesh që të jemi bartës të dritës në jetën tonë, duke ofruar kujdes dhe solidaritet për të tjerët.
Faleminderit.
Last modified: 14 Dhjetor, 2023