Prishtinë, 20 qershor 2023
Kryeministri i Republikës së Kosovës, Albin Kurti, bashkë me zëvendëskryeministren, njëherësh Ministre e Punëve të Jashtme dhe Diasporës, Donika Gërvalla-Schwarz, kanë mbajtur sot konferencë për media.
Gjeni të plotë fjalën e kryeministrit Kurti në konferencën për media:
Të nderuara medie,
Të dashur qytetarë,
Mirëdita dhe ju falemnderit që i jeni përgjigjur pozitivisht ftesës sonë për këtë konferencë të ftuar së bashku me Zëvendëskryeministren dhe Ministren e Punëve të Jashtme dhe Diasporës, zonjën Donika Gërvalla- Schwarz.
Në mesditën e 14 qershorit, u ushtrua agresion i Serbisë ndaj shtetit demokratik të Kosovës, me rrëmbimin e tre zyrtarëve të Policisë sonë, thellë në brendi të territorit të Republikës. Ky akt agresioni i pashembullt nga formacionet ushtarake policore të Serbisë është hakmarrje direkte ndaj Policisë së Kosovës, vetëm e vetëm sepse po luftohet krimi i organizuar, dhe që ka për synim destabilizimin atëherë kur veç një ditë para, pra më 13 qershor, patëm propozuar planin pesë pikësh për deeskalim të plotë të situatës në veri të vendit tonë.
Arrestimi i kapos të krimit të organizuar dhe njërit prej krerëve të ashtuquajturës “Mbrojtje civile”, strukturë ilegale kjo e Serbisë në Kosovë, Milun Milenkoviç – Llune, shfaqi efikasitet të jashtëzakonshëm, dhe nga ana e Serbisë u përcoll me hakmarrje ndaj aksioneve për sundim të rendit dhe ligjit në Republikën tonë. Një ditë pas arrestimit, Serbia pra, përdori instrumentin më qyqarë e të kundërligjshëm ndërkombëtarisht, pra atë të rrëmbimit të tre zyrtarëve të Policisë së Kosovës. Për këtë hakmarrje çnjerëzore, kemi kërkuar denoncim të hapur dhe kundërshtim me forcën e ligjit nga të gjithë partnerët tanë.
Në vendin e ngjarjes ka qenë Policia e Kosovës, ka qenë edhe KFOR-i, aty kanë gjetur gjurmët e çizmeve, këpucë të huaja në drejtim të Serbisë, kanë gjetur edhe prangat lidhëse të plastikës së forcave të Serbisë.
Rrëmbimi është zhvilluar me plan, me njerëz të armatosur që i përkasin dy formacioneve, atij të Njësitit Special Antiterrorist, që njihet me akronimin “SAJ”, dhe të formacionit të Njësive Ushtarake Speciale, që njihen me emrin “Kobra”.
Ata që pretendojnë se policët janë arrestuar në Serbi, duhet ta shpjegojnë se si lidhëset e tyre të plastikës si pranga, kanë qenë pikërisht në vendin ku tashmë kemi njoftuar në konferencën e 15 qershorit, unë bashkë me ministrin Sveçla, pas Mbledhjes së Këshillit të Sigurisë së Kosovës, pra 1 kilometër larg kufirit në njërën anë, në pjesën veriperëndimore, 670 metra larg në veri –verilindje nga kufiri me Serbinë dhe 300 metra në jugperëndim të kufirit sërish larg prej Serbisë, e në brendi të territorit të Kosovës.
Vendngjarja e rrëmbimit të tre policëve të Kosovës ka ndodhur në Kosovë. Nuk bëhet fjalë për kurrfarë arrestimi në Serbi, bëhet fjalë për rrëmbim në Kosovë. Për rrëmbimin, janë kontaktuar të gjithë mekanizmat vendor dhe ndërkombëtar që policët tanë të lirohen sa më parë dhe të kthehen në vendin e tyre.
Këtu një punë të jashtëzakonshme e ka bërë pikërisht Ministria e Punëve të Jashtme dhe Diasporës, për çfarë unë e falënderoj zëvendësen time dhe Ministren Gërvalla dhe gjithë ekipin e saj, e ambasadorët e diplomatët tanë të tjerë të shërbimit tonë të jashtëm për komunikimin që kanë zhvilluar, për letrat që kanë dërguar në mënyrë që të ngritët një valë e drejtë ndërkombëtare që kërkon lirimin e menjëhershëm e të pakusht të tre policëve të rrëmbyer.
Ne jemi në komunikim të vazhdueshëm edhe me Zyrën Ndërlidhëse të Republikës së Kosovës në Serbi, me shefin e zyrës, ambasadorin Jetish Jashari. Ai ka qenë në kontakt me institucionet atje, në përpjekje për të marrë sa më shumë informacione për gjendjen e policëve të rrëmbyer. Ambasadori Jashari sot i ka vizituar të tre policët, të cilët po mbahen peng nga Serbia, i ka vizituar ndaras njërin pas tjetrit. Përshkrimi i tre policëve se si ka ndodhur rrëmbimi është i njëjtë. Janë tri rrëfime ndaras identike të tre njerëzve të cilët thonë se në momentin e rrëmbimit me 14 qershor kanë qenë tek tryeza e improvizuar për ngrënie, pra kanë qenë duke ngrënë drekë së bashku, kur 15 persona i kanë rrethuar, i kanë sulmuar dhe i kanë rrëmbyer. Të tre kanë qenë bashkë dhe që të tre e thonë rrëfimin e njëjtë kur pyeten ndaras nga njëri-tjetri nga ambasadori ynë, Jetish Jashari. Kjo heq çfarëdo dileme edhe për ata të cilët dëshirojnë të jenë skeptikë për të drejtën e Kosovës, se Serbia ka zhvilluar agresion me 14 qershor dhe ka rrëmbyer tre policët tanë.
Vendi ku ndodhet tryeza e ngrënies është 7 metra prej veturës së policisë. Edhe një herë pikërisht në atë vend ku e kemi theksuar qysh me datën 15 qershor, pra 1 kilometër në brendi nga njëra anë, 300 metra nga ana tjetër dhe 670 metra nga ana tjetër. Pra, gjithsesi në brendi, vetëm 7 metra larg veturës së tyre.
Ne jemi në të drejtën tonë, në të drejtën e Republikës dhe dëshmitë që posedojnë institucionet tona të sigurisë, dhe dëshmia e tre policëve tanë, dokumentojnë qartë se zyrtarët e Policisë së Kosovës, pra ishin brenda territorit të Republikës. Policët ishin në nivel detyre, në luftim të kontrabandës, aty ku është mbyllur njëra nga 16 rrugët ilegale, që janë mbyllur në vitin e kaluar. Pra rrugët ilegale duhet të ngelen rrugë ilegale të pakapërcyeshme, prandaj edhe i kemi pasur policët aty.
Ne jemi Republikë demokratike dhe këtu kemi sundim të ligjit, nuk ka as nënshtrim e as kthim mbrapa. Jemi në të drejtën tonë të respektimit të kushtetushmërisë dhe ligjshmërisë, për shtet të së drejtës, kundër asnjë qytetari ose komuniteti, por në mbrojtje të ligjit dhe të rendit.
Edhe një herë kërkojmë lirimin e menjëhershëm të tre zyrtarëve policor. Ata duhet të lirohen sa më parë, pa kushte dhe të pacenuar. Njëkohësisht kërkojmë nga faktorët ndërkombëtarë, Bashkimi Evropian, Shtetet e Bashkuara të Amerikës dhe NATO-ja që ta dënojnë agresionin e Serbisë që paraqet edhe shkelje të pikës katër të Marrëveshjes tekniko-ushtarake të Kumanovës, më 9 qershor të vitit 1999.
Ju falemnderit shumë, e tash po ia kaloj fjalën Zëvendëskryeministres dhe Ministres për Punë të Jashtme dhe Diasporë, zonjës Donika Gërvalla Schwarz, e cila do t’ua shpjegojë më gjerësisht për informacionin që kemi marrur nga raportimi i ambasadorit tonë Jetish Jashari.
Faleminderit!
************
Fjala e zëvendëskryeministres, njëherësh Ministre e Punëve të Jashtme dhe Diasporës, Donika Gërvalla Schwarz, në konferencën për media:
Faleminderit shumë!
Të nderuar përfaqësues të mediave,
Të nderuar qytetarë të Republikës së Kosovës,
Duke e ditur interesimin e jashtëzakonshëm të qytetarëve të Republikës rreth gjendjes së tre oficerëve tanë policorë, të cilët janë rrëmbyer dhe janë dërguar në Serbi, do të doja të ndajë disa detaje më të thella me ju.
Pra, sot me datën 20 qershor 2023, ambasadori Jetish Jashari, i cili është përfaqësues i Republikës së Kosovës në Serbi, pra, është drejtuesi i Zyrës Ndërlidhëse në Beograd, ka realizuar vizitën tre oficerëve policorë të Republikës së Kosovës, pra, z. Beqir Sefa, z. Rifat Zeka dhe z. Shemë Mustafa, të cilët javën rrëmbyer brenda territorit të Republikës së Kosovës nga forcat serbe me datë 14 qershor 2023.
Vizita është realizuar në qendrën e paraburgimit në Kralevë, ku tre oficerë të Republikës së Kosovës janë duke u mbajtur që nga data 16 qershor 2023 dhe të cilët Prokuroria e Lartë e Kralevës po i mban nën akuzën tashmë vetëm për armëmbajtje pa leje.
Takimet janë mbajtur të ndara nga 15 minuta secili dhe aty secili prej oficerëve policorë ka përshkruar ngjarjen e rrëmbimit të tyre që nga momenti i kapjes deri tek dalja para prokurorit dhe gjykatësit të procedurës paraprake në Gjykatën e Lartë të Kralevës më 16 qershor 2023.
Ata kanë theksuar si në vijim: Më 14 qershor 2023, rreth orës 12:30 minuta, duke ngrënë drekën papritmas janë rrethuar nga rreth 15 persona të uniformuar, të cilët më vonë kanë rezultuar të jenë pjesëtarë të forcave të sigurisë të Serbisë dhe të armatosur të cilët i kanë sulmuar dhe çarmatosur dhe pastaj me thes në kokë i kanë dërguar tek makinat e tyre, pra tek makinat e forcave serbe.
Me rastin e sulmit ndaj tre policëve të Republikës së Kosovës, z. Sefa ka theksuar se disa nga pjesëtarët e forcave të sigurisë së Serbisë kanë shkrepur armët në ajër. Sipas të gjitha gjasave, mendon ai, për të shkaktuar panik tek oficerët policorë dhe për ta bërë më të vështirë rezistencën e tyre.
Në momentin e kidnapimit, tre policët e Republikës së Kosovës kanë qenë duke ngrënë drekë në tavolinën e improvizuar, e cila menjëherë është afër gropës së parë dhe afër 15 metra larg gropës së dytë. Sa për sqarim ju e dini që gropat ndodhen në veri për të bllokuar rrugët ilegale, për të bllokuar kalimin përmes këtyre rrugëve ilegale të automjeteve të cilat sjellin mallra kontrabandues. Dhe të dyja gropat, sipas oficerëve policorë janë brenda territorit të Republikës së Kosovës, që nuk është larg mendsh, sepse ne nuk hapim gropa në territorin e Serbisë dhe së paku 200 metra larg vijës kufitare që e ndanë Republikën e Kosovës me Serbinë, pra gropat.
Pas kidnapimit të tyre, ata janë dërguar fillimisht diku brenda territorit të Rashkës, ku pas rreth 1 ore kanë ardhur forca të tjera të sigurisë së Serbisë dhe i kanë dërguar ata diku në Beograd.
Në Beograd janë mbajtur pastaj deri më 16 qershor, kur ka skaduar afati prej 48 orësh i mbajtjes në polici. Kanë theksuar se gjatë kësaj periudhe 48 orëshe nuk janë maltretuar fizikisht, mirëpo nuk iu është dhënë ushqim i mjaftueshëm, vetëm nga një copë bukë dhe jo më shumë.
Ndërsa, z. Shemë Mustafa i cili ka probleme kronike shëndetësore me organet e frymëmarrjes i është dhënë vetëm një injeksion, nuk dihet se me çfarë efekti, dhe një pompë për frymëmarrje.
Gjatë kësaj kohe tre oficerët policorë të Republikës së Kosovës kanë pasur të caktuar tre avokatë sipas detyrës zyrtare. Nga momenti i shqiptimit të masës së zgjatjes së paraburgimit edhe për 30 ditë nga Gjykata e lartë në Kralevë, tre oficerët policorë të Republikës së Kosovës janë vendosur në Qendrën e paraburgimit në Kralevë. Ata tani janë të vendosur në dhoma të veçanta, pra tek e tek, mirëpo nuk kanë qasje as në televizion, as në ndonjë formë tjetër të mediave të shkruara, gazetave etj.
Sipas tyre, trajtimi nga ana e personelit të burgut, pra gardianët dhe stafi tjetër është korrekt. Atyre iu jepet ushqim në baza të rregullta ditore edhepse cilësia sipas njërit prej tyre është jo e mirë.
Dje nga autoritetet e burgut ju kanë dhënë ndërresa të brendshme dhe aksesorë të higjienës, mirëpo z. Shemë Mustafa ka theksuar se i mungojnë ende medikamentet bazike të cilat i përdorë rregullisht për gjendjen e tij shëndetësore dhe se kjo po ia vështirëson shumë qëndrimin në burg.
Përmes ambasadorit Jashari dhe kontaktit me familjen e tij, do të përpiqemi që sa më shpejtë të sigurojmë medikamentet, me qëllim që z.Mustafa të ketë të paktën medikamentet e nevojshme. Ata janë takuar edhe dje me avokatët mbrojtës të angazhuar dhe me atë të angazhuar nga institucionet tona dhe theksuan se ata do të vizitohen nga ai gjatë ditëve në vijim.
Atyre iu është thënë se do të mund të vizitohen nga familjarët e tyre ditën e premte, por na mbetet të presim se sa do të mund të realizohet një takim i tillë.
Këto janë detajet me të cilat na ka pajisur ambasadori Jashari, prandaj nëse ka pyetje rreth tyre jemi në dispozicion.
Last modified: 20 Qershor, 2023