Prishtinë, 15 korrik 2009
Kryeministri i Republikës së Kosovës, Hashim Thaçi ka theksuar se Qeveria e Republikës së Kosovës është përcaktuar që të lëvizë përpara me projektin për ndërtimin e Termocentralit të ri “Kosova e Re”, pas një serie të gjatë të diskutimeve dhe analizave.
Në këtë drejtim, kryeministri Thaçi ka theksuar se Komiteti Drejtues për ndërtimin e Termocentralit të ri “Kosova e Re”, ka aprovuar me një unanimitet të plotë një strategji të gjerë për sektorin e energjisë dhe që ka për qëllim furnizimin e qëndrueshme dhe kualitative me energjie në Kosovë.
Kryeministri Thaçi ka theksuar se kjo do të realizohet përmes arritjes së pesë objektivave:
E para: Ndërtimi i termocentralit “Kosova e Re” dhe hapja e mihjes së thëngjillit në Sibofc. Kapaciteti i termocentralit të ri do të jetë në fazën e parë prej 1000 megavateve dha ai do të ndërtohet pran termocentralit Kosova B.
E dyta: Termocentrali ekzistues “Kosova B”, përmes partneritetit publiko-privat do të rigjenerohet dhe të adoptohet për prodhim.
E treta: Termocentrali A, me përkrahjen edhe të Komisionit Evropian do të mbyllet më së largu deri në fund të viti 2015. Realizimi i projektit për termocentralin e ri “Kosova e Re” do të kompensojë mungesën e energjisë së prodhuar nga termocentrali “Kosova A”.
E katërta: Qeveria do të vazhdojë me projektin për ristrukturimin dhe privatizimin e KEK-ut. Qeveria e Kosovës beson se privatizimi i distribuimit te KEK-ut do te përmirësoje humbjet teknike.
E pesta: do të vazhdohet me investimet ne prodhimin e energjisë alternative – hidroenrgjisë, energjisë solare dhe energjisë së erës.
Kryeministri i Republikës së Kosovës, Hashim Thaçi, ka theksuar se gjatë vjeshtës së këtij viti do të organizohet një Konferencë e donatorëve për sektorin e energjetikës në Kosovë, në mbështetje të USAID-it, Bankës Botërore dhe Komisionit Evropian.
