Prishtinë, 11 gusht 2009
Nën drejtimin e kryeministrit të Republikës së Kosovës, Hashim Thaçi, Këshilli i Sigurisë, sot në takimin e tretë të radhës e ka vlerësuar stabile gjendjen e sigurisë së përgjithshme në Kosovë.
“Institucionet dhe organet e sigurisë në vend janë duke i kryer detyrat e tyre në nivel të lartë dhe ka një bashkëpunim të mirë midis Policisë së Kosovës, EULEX-it dhe KFOR-it në fushën e rendit”, ka thekuar kryeministri Thaçi.
Është vlerësuar se ditëve të kaluara edhe pse ka pasur disa incidente në veri të Kosovës, situata e përgjithshme është e qetë dhe ka një progres në menaxhimin e kufijve dhe të doganave. Po ashtu, u konstatua se ka një rënie të veprave kriminale dhe të rasteve të dhunës ndëretnike.
Është përshëndetur kthimi i pjesëtarëve të komunitetit serbë në Policinë e Kosovës dhe në qendrat e paraburgimit.
Këshilli i Sigurisë, ka kërkuar nga organet e drejtësisë që të punojë për zbardhjen e vrasjes së dy banorëve serbë të Parteshit të Gjilanit. Është kërkuar që ky rast mos të politizohet dhe të priten rezultatet e hetimeve.
Në takimin e sotëm, Këshilli i Sigurisë u ka dhënë mbështetje finalizimit të Strategjisë Kombëtare të Sigurisë dhe Strategjisë për Forcën e Sigurisë. Po ashtu, sot i është dhënë mbështetje Projektligjit për Klasifikimin e Informatave, i cili pas miratimit nga Qeveria do të procedohet në Kuvendin e Kosovës.