Prishtinë, 23 korrik 2013
Kryeministri i Republikës së Kosovës, Hashim Thaçi uron Familjen Mbretërore të Mbretërisë së Bashkuar, me rastin e lindjes së djalit të Dukës dhe Dukeshës së Kembrixhit.
Në telegramin e urimit thuhet:
E nderuara Familje Mbretërore,
Ju lutem pranoni urimet më të mira në emër të Qeverisë së Republikës së Kosovës dhe në emrin tim, me rastin e lindjes së djalit të Dukës dhe Dukeshës së Kembrixhit.
Në këtë moment të rëndësishëm për ju dhe popullin tuaj, dua të rikthej në kujtesë marrëdhëniet e shkëlqyera mes vendit tonë dhe Mbretërisë së Bashkuar.
Institucionet dhe qytetarët e Republikës së Kosovës vlerësojnë lartë dhe ju jemi mirënjohës për gjithë mbështetjen që Mbretëria e Bashkuar i ka dhënë Kosovës dhe popullit të saj në momentet më vendimtare.
Me këtë rast, djalit të vogël i urojmë shëndet dhe jetë të gjatë e të lumtur, bashkë me prindërit, Dukën dhe Dukeshën e Kembrixhit dhe gjithë Familjen Mbretërore.
Hashim Thaçi,
Kryeministër i Republikës së Kosovës
