Në telegramin e urimit thuhet:
Prishtinë, 30 dhjetor 2012
Dita e Veteranëve të Ushtrisë Çlirimtare të Kosovës është ndër datat më të rëndësishme të historisë së rezistencës së popullit tonë për liri dhe çlirim, që sot shënohet në tërë Kosovën.
Kjo datë vjen nga kalendari i 30 dhjetorit 1991, kur Komandanti legjendar Adem Jashari dhe bashkëluftëtarët e tij me rezistencë të armatosur iu kundërvunë forcave serbe ushtarake dhe policore, duke treguar se ky vend ka dalëzotës të panënshtruar.
Me kalimin e kohës, nisma e kësaj rezistence u shndërrua në luftëtë të Ushtrisë Çlirimtare të Kosovës , që sintetizoi vullnetin kombëtar, politik dhe çlirimtar të të gjithë qytetarëve të Kosovës.
Sot, kur shënohet Dita e Veteranëve të UÇK-së, Kosova është shtet i lirë, i pavarur, sovran dhe ka hyrë me plot suksese në fazën e pas-mbikëqyrjes ndërkombëtare.
Mbrojtja institucionale e të gjitha kategorive shoqërore që kanë kontribuuar për lirinë dhe pavarësinë e Kosovë është prioritet i Qeverisë së Republikës së Kosovës.
Prandaj në Qeverinë e Republikës së Kosovës është duke u punuar intensivisht që ligji për veteranët e UÇK-së të finalizohet sa më parë.
Qeveria e Republikës së Kosovës, punon dhe angazhohet çdo ditë në përmbushjen e të gjitha parakushteve, që Kosova sa më parë të bëhet pjesë e të gjitha institucioneve euroatlantike.
Urime Dita e Veteranëve të UÇK-së.
Hashim Thaçi
Kryemnistër i Republikës së Kosovës