Prishtinë, 14 tetor 2009
Kryeministri i Republikës së Kosovës, Hashim Thaçi ka pritur sot në një takim shefin e Zyrës Ndërlidhëse të Komisionit Evropian në Prishtinë, Renzo Daviddi.
Me këtë rast, z.Daviddi në emër të Komisionit Evropian, i dorëzoi kryeministrit Thaçi Raportin e Progresit të vitit 2009 dhe Studimin e Fizibilitetit për Kosovën.
Kryeministri Hashim Thaçi në takim ritheksoi përkushtimin e institucioneve të Republikës së Kosovës për thellimin e angazhimeve për implementimin e të gjitha standardeve për integrim në institucionet e Bashkimit Evropian dhe në NATO.
Kryeministri Thaçi u shpreh se Raporti i Progresit dhe Studimi i Fizibilitetit për Kosovën konfirmojnë perspektivën e qartë evropiane të Kosovës. Në këtë kuadër, kryeministri Thaçi tha se Qeveria e Republikës së Kosovës vetëm sa do t’i rrisë përkushtimet e saj për qeverisje të mirë, transparente, efektive, për sundimin e rendit dhe ligjit, luftën e pakompromis kundër korrupsionit dhe krimit të organizuar.
Avancimi i mëtejmë i progresit të arritur në Kosovë dhe tejkalimi i sfidave në rrugën drejt integrimeve evropiane do të vazhdojnë të mbeten angazhime kryesore të qeverisë dhe të gjitha institucioneve të Republikës së Kosovës, potencoi kryeministri Thaçi.
