Prishtinë, 7 tetor 2009
Kryeministri i Republikës së Kosovës, Hashim Thaçi dhe kryeministri i Republikës së Shqipërisë Sali Berisha sot kanë bërë homazhe pranë varrezave të dëshmorëve në Prekaz, dhe më pas kanë qëndruar në familjen Jashari.
Kryeministrit Thaçi dhe kryeministrit Berisha u kanë dëshiruar mirëseardhje në Prekaz përfaqësuesit e familjes Jashari, Rifat e Murat Jashari.
Gjatë këtij takimi të shkurtër kryeministri Sal Berisha tha se asgjë nuk kemi më frymëzuese se Prekazin dhe e quajti atë Krujën e dytë të shqiptarëve.
“Edhe një herë dua t’i shpreh nderimin tim më të madh familjes Jashari, të përulem para tribunit legjendar Adem Jashari dhe të gjithë anëtarëve të familjes së tij, që u flijuan për të mos u dorëzuar, për flamurin dhe dinjitetin e Kosovës dhe të shqiptarëve”, tha z. Sali Berisha.
Më tutje kryeministri Berisha tha se Prekazi është sakrifica e popullit shqiptar, ndërsa komandanti Adem Jashari dhe familja Jashari, kurora e kësaj sakrifice.
Në emër të familjes Jashari, z. Murat Jashari, me këtë rast ka falënderuar kryeministrin e Shqipërisë, qeverinë shqiptare për mbështetjen që i ka dhënë Kosovës para, gjatë dhe pas luftës.
