Prishtinë, 20 gusht 2009
Kryeministri i Republikës së Kosovës, Hashim Thaçi, ka pritur sot në takim lamtumirës ambasadoren e Republikës së Francës në Prishtinë, znj. Delphine Borione.
Kryeministri i Republikës së Kosovës, Hashim Thaçi në një takim të përzemërt dhe miqësor ka falënderuar ambasadoren Borione për punën e shkëlqyer që ka bërë gjatë shërbimit të saj në Kosovë. Z. Thaçi po ashtu ka falënderuar Qeverinë dhe popullin e Francës për ndihmën dhe përkrahjen që i ka dhënë dhe po i jep Kosovës.
“Qeveria e Republikës së Kosovës është e përkushtuar që ky bashkëpunim frytdhënës të thellohet edhe më shumë në të ardhmen”, ka thënë kryeministri Thaçi .
Kryeministri Hashim Thaçi me këtë rast ka potencuar progresin e arritur në Kosovë në të gjitha sferat, si dhe sfidat e institucioneve të Republikës së Kosovës për integrimin e vendit në institucionet euroatlantike.
Zonja Delphine Borione është falënderuar për mikpritjen që i është ofruar në Kosovë dhe është shprehur shumë e kënaqur me bashkëpunimin e sinqertë dhe të frytshëm me Qeverinë dhe institucionet e tjera të vendit.
Po sot, kryeministri Hashim Thaçi ka takuar ambasadorin e Gjermanisë në Prishtinë z. Hans Dieter Steinbach
Kryeministri i Republikës së Kosovës, Hashim Thaçi, ka pritur në një takim pune ambasadorin e Gjermanisë në Prishtinë z. Hans Dieter Steinbach me të cilin ka diskutuar lidhur me zhvillimet në Kosovë dhe bashkëpunimin midis dy vendeve.
Në takim është vlerësuar i kënaqshëm niveli i bashkëpunimit midis Republikës së Kosovës dhe RF Gjermane. Të dy bashkëbiseduesit janë pajtuar për nevojën e thellimit të mëtejmë të marrëdhënieve bilaterale me theks të veçantë të bashkëpunimit në fushën e zhvillimit ekonomik.
Kryeministri Hashim Thaçi ka njoftuar ambasadorin Steinbach lidhur me prioritete e Qeverisë, njëra prej të cilave është agjenda evropiane e Kosovës. “Qeveria e Republikës së Kosovës është e përkushtuar në zbatimin e Planit të Veprimit për Partneritet Evropian dhe të gjitha kritereve në kuadër të procesit të Integrimit Evropian”, ka theksuar kryeministri Hashim Thaçi.
Ambasadori Hans Dieter Steinbach është shprehur se vendi i tij do të mbështesë Kosovën në proceset e paqes dhe të integrimeve evropiane.
