Bradash, Podujevë, 30 maj 2025
Kryeministri në detyrë i Republikës së Kosovës, Albin Kurti, së bashku me ministren në detyrë të Arsimit, Shkencës, Teknologjisë dhe Inovacionit, Arbërie Nagavci dhe kryetarin e Komunës së Podujevës, Shpejtim Bulliqi, vendosën sot gurthemelin e objektit të ri të Shkollës Fillore të Mesme të Ulët “Nuhi Gashi”, në fshatin Bradash.
Objekti i ri i shkollës, që mban emrin e mësuesit të devotshëm Nuhi Gashi, i cili qe bashkëluftëtar i Shaban Polluzhës, do ketë një hapësirë prej 1,330 m² brenda së cilës nëntë klasa mësimi dhe një sallë të arsimtarëve, dhoma të veçanta për kabinetet e shkencave natyrore dhe shoqërore, hapësira të nevojshme për administratë, dhe tualete sipas standardeve bashkëkohore, përfshirë edhe ato për fëmijët me nevoja të veçanta. Ky është një investim i Komunës së Podujevës në vlerë prej 624,249.74 euro. Punimet pritet të kryhen brenda dy vjetëve.
Në ceremoninë e vënies së gurthemelit të shkollës së re, ku të pranishëm ishin edhe deputetë të kuvendit, drejtorë të komunës, asamblistë, mësimdhënës, nxënës, e banorë të
Bradashit, kryeministri tha se ndërtimi i objektit të ri shkollor përbën një lajm të mirë për arsimin, për Bradashin, për Podujevën dhe për të gjithë prindërit, të cilët do t’i sjellin fëmijët e tyre në shkollën “Nuhi Gashi”. Ai falënderoi komunën për investimin dhe fshatin, i cili ka kontribuuar, është interesuar dhe angazhuar që të arrijnë deri te vendosja e gurthemelit të shkollës së re.
Ministrja e Arsimit, Shkencës, Teknologjisë dhe Inovacionit, Arbërie Nagavci, u shpreh se në Komunën e Podujevës gjatë këtyre viteve ka pasur një investim të jashtëzakonshëm në përmirësimin e infrastrukturës shkollore. Ajo tha se vetëm nga Ministria e Arsimit janë investuar më shumë se 8.5 milionë euro, janë ndërtuar pesë shkolla e tre çerdhe, teksa theksoi rëndësinë që krahas infrastrukturës moderne që po mundësohet nga ana e qeverisë e ministrisë edhe mësimdhënësit të japin më të mirën e tyre që të kemi rezultate sa më të mira të nxënësve.
Ndërkaq, kryetari i Komunës së Podujevës, Shpejtim Bulliqi, tha se ky është objekti i nëntë shkollorë në këto pesë vjet të qeverisjes, dhe se po punohet bashkë edhe me Qeverinë dhe Ministrinë e Arsimit që çdo ditë e më shumë të krijohen kushte sa më të mira për nxënësit tanë.
Prononcimi i plotë i kryeministrit Kurti:
Bashkë me ministren e Arsimit, Shkencës, Teknologjisë dhe Inovacionit, Arbërie Nagavci, erdhëm në Bradash të Podujevës, ku u mirëpritëm nga nikoqiri kryetari i Komunës, Shpejtim Bulliqi, por edhe deputetë, drejtorë të komunës, asamblistë, mësimdhënës e nxënës, dhe banorë të Bradashit, me rastin e vendosjes së gurthemelit të shkollës së re, e cila do t’i ketë nëntë klasë mësimore, një sallë të arsimtarëve, do të kushtojë afër 625 mijë euro, një sipërfaqe e gjithmbarshme prej 1,330 m², në dy etazhe, me hapësirë për administratë, me tualete moderne, që përfshijnë edhe ato për fëmijët me nevoja të veçanta.
Ky është lajm i mirë për arsimin, për Bradashin, për Podujevën dhe për të gjithë prindërit të cilët do t’i sjellin fëmijët e tyre në shkollën “Nuhi Gashi”, në shkollën e cila e mbanë emrin e një mësuesi të devotshëm e bashkëluftëtarit të Shaban Polluzhës.
Unë falënderoj komunën dhe fshatin, sepse i gjithë investimi është i Komunës së Podujevës, e fshati është ai i cili ka kontribuuar, është interesuar dhe është angazhuar që të vijmë deri të kjo ditë e vendosjes së gurthemelit. Punimet do të kryhen për maksimum dy vjet, e me kryetarin do të përpiqemi që të jenë edhe më shpejtë se aq.
Faleminderit! Urime e gëzofshi!
