Vitomiricë, Pejë dhe Trubuhoc, Istog, 8 gusht 2025
Kryeministri në detyrë i Republikës së Kosovës, Albin Kurti, i shoqëruar nga ministri në detyrë i Punëve të Brendshme, Xhelal Sveçla dhe Drejtori Ekzekutiv i Agjencisë së Menaxhimit të Emergjencave, Genc Metaj, vizituan sot familjen e zjarrfikësit Sefadin Osmanaj në 1-vjetorin e rënies së tij në krye të detyrës. Në Vitomiricë të Pejës, në shtëpinë e familjes Osmanaj, u pritën nga babai Shaban Osmanaj, bashkëshortja Gjejrane dhe dy djemtë e tij, Erjoni dhe Edi. Gjatë kësaj vizite, bashkë me familjarë, ata vendosën lule të freskëta pranë varrit dhe përmendores të tij Trubuhoc të komunës së Istogut.
Sefadin Osmanaj do të kujtohet gjithmonë me mirënjohje të thellë për përkushtimin e tij ndaj detyrës dhe profesionit fisnik të zjarrfikësit.
