Davos, 22 janar 2025
Në Shtëpinë e Zvicrës në Davos, u nënshkrua Marrëveshja për Tregtinë e Lirë mes shteteve anëtare të EFTA-s dhe Republikës së Kosovës, ku mori pjesë Kryeministri i Republikës së Kosovës, Albin Kurti, bashkë me Ministren e Industrisë, Ndërmarrësisë dhe Tregtisë, Rozeta Hajdari.
Prezent ishin dhe ministrat përkatës të katër shteteve anëtare të EFTAS, Ministrja e Shkëmbimit Tregtar dhe Industrisë së Norvegjisë, Cecilie Myrseth, Ministrja e Punëve të Jashtme, Edukimit dhe Sportit të Lihtenshtajnit, Dominique Hasler, Këshilltari Federal i Zvicrës njëherësh Kryesuesi i Departamentit për Çështje Ekonomike, të Arsimit dhe Hulumtimit, Guy Parmelin, Sekretari i Përhershëm i Shtetit të Islandës, Martin Eyjólfsson, si dhe Sekretari i Përgjithshëm i EFTA-s, Kurt Jäger.
Në fjalën e tij, kryeministri Kurti shprehu se është nder dhe kënaqësi që në Shtëpinë e Zvicrës në Davos festojmë një moment historik të rëndësishëm – nënshkrimin e Marrëveshjes së Tregtisë së Lirë ndërmjet Kosovës dhe shteteve të EFTA-s.
“Kjo ngjarje shënon fillimin e një kapitulli të ri në forcimin e lidhjeve ekonomike dhe thellimin e marrëdhënieve tregtare ndërmjet Republikës së Kosovës dhe shteteve të EFTA-s”, tha kryeministri Kurti.
Duke theksuar mirënjohjen për vendet anëtare të EFTA-s për përkushtimin dhe bashkëpunimin e tyre të ngushtë gjatë procesit të negociatave, kryeministri shtoi se kjo marrëveshje vendos një kornizë për marrëdhëniet tregtare ndërmjet shteteve të EFTA-s dhe Kosovës dhe do të krijojë mundësi të reja duke i dhënë Kosovës qasje në tregjet e EFTA-s.
“Hap mundësi të reja eksporti për bizneset tona dhe integrim më të thellë në kuadrin ekonomik evropian, duke na mundësuar të konkurrojmë në një shkallë më të gjerë. Kjo marrëveshje pasqyron gjithashtu angazhimin tonë të përbashkët ndaj parimeve të demokracisë, sundimit të ligjit, të drejtave të njeriut, mbrojtjes së mjedisit, qeverisjes së mirë të korporatës dhe përgjegjësisë sociale të korporatës”, u shpreh ai.
Këshilltari Federal i Zvicrës, Guy Parmelin tha në fjalën e tij se me këtë qeveri, me këtë marrëveshje të tregtisë së lirë që është ambicioze, po bëjmë edhe një hap tjetër të rëndësishëm në thellim të marrëdhënieve ekonomike ndërmjet Kosovës dhe Zvicrës.
Ministrja e Shkëmbimit Tregtar dhe Industrisë së Norvegjisë, Cecilie Myrseth tha se pikë kyçe e marrëveshjes është gjithëpërfshirja e tregtisë dhe sidomos ajo e shërbimeve, e cila është përfshirë në fazat e mëvonshme të negociatave me kërkesë të Kosovës. “Kjo e bën Kosovën vendin e parë në rajon që EFTA e ka përfshirë në sektorin e shërbimeve në marrëveshjet e tregtisë së lirë. Jam e bindur që kjo do të shtyjë përpara rritjen ekonomike, duke krijuar mundësi të reja për bizneset, industritë dhe qytetarët, në të dyja anët”, theksoi ajo.
Në vijim, Sekretari i Përhershëm i Shtetit të Islandës, Martin Eyjólfsson, shprehu se marrëveshja vendos në veprim një fazë të re të zhvillimit ekonomik dhe marrëdhënieve tregtare, që do të krijojë lidhje e potencial për eksport në dobi të dyanshme për të ardhmen. Ai shtoi se që nga pavarësia e Kosovës në vitin 2008, Islanda ka vërejtur një ekonomi në rritje të Kosovës, që e cilësoi një rritje të shkëlqyeshme veçanërisht në katër vitet e fundit, e ku përgëzoi vendin tonë për progresin e tillë ekonomik dhe demokratik.
Duke shprehur se kjo marrëveshje përveç rëndësisë ekonomike ka edhe rëndësi politike, Ministrja e Punëve të Jashtme, Edukimit dhe Sportit të Lihtenshtajnit, Dominique Hasler, nënvizoi përforcimin e raporteve me vendet e Ballkanit Perëndimor, por po ashtu rëndësinë e kësaj marrëveshjeje për të përkrahur integrimin e mëtejmë të Kosovës në rendin ndërkombëtar.
Nga ana e saj, ministrja Hajdari, në adresimin e saj nënvizoi se kjo arritje është rezultat i një pune të palodhshme, përpjekje të madhe dhe dedikim i të gjithë të angazhuarve. “Ftojmë investitorët nga shtetet e EFTA-s që të investojnë në Kosovë, që të maksimizojnë profitet e tyre, duke shfrytëzuar potencialin e madh”.
Fjala e kryeministrit Kurti në pas nënshkrimit të marrëveshjes:
E nderuara Cecilie Myrseth, Ministre e Tregtisë dhe Industrisë së Norvegjisë/ Kryetare e EFTA-s në nivel ministror
I dashur Dominique Hasler, Ministër i Punëve të Jashtme, Arsimit dhe Sportit të Lihtenshtajnit
I dashur Guy Parmelin, Këshilltar Federal, Zvicër
I nderuar Martin Eyjólfsson, Sekretar i Përhershëm i Shtetit, Ministria e Punëve të Jashtme, Islandë
I nderuar Kurt Jäger, Sekretar i Përgjithshëm i EFTA,
E nderuara Rozeta Hajdari, Ministre e Industrisë, Ndërmarrësisë dhe Tregtisë, Republika e Kosovës,
Të dashur miq, të nderuar të ftuar,
Është nder dhe kënaqësi që jam sot këtu, në “Shtëpinë e Zvicrës” në Davos për të festuar një moment historik të rëndësishëm – nënshkrimin e Marrëveshjes së Tregtisë së Lirë ndërmjet Kosovës dhe shteteve të EFTA-s. Kjo ngjarje shënon fillimin e një kapitulli të ri në forcimin e lidhjeve ekonomike dhe thellimin e marrëdhënieve tregtare ndërmjet Republikës së Kosovës dhe shteteve të EFTA-s.
Dëshiroj të shpreh mirënjohjen time të sinqertë për vendet anëtare të EFTA-s për përkushtimin dhe bashkëpunimin e tyre të ngushtë gjatë procesit të negociatave. Marrëveshja që ne po nënshkruajmë sot vendos një kornizë për marrëdhëniet tregtare ndërmjet shteteve të EFTA-s dhe Kosovës dhe do të krijojë mundësi të reja duke i dhënë Kosovës qasje në tregjet EFTA. Ajo hap mundësi të reja eksporti për bizneset tona dhe integrim më të thellë në kuadrin ekonomik evropian, duke na mundësuar të konkurrojmë në një shkallë më të gjerë.
Kjo marrëveshje pasqyron gjithashtu angazhimin tonë të përbashkët ndaj parimeve të demokracisë, sundimit të ligjit, të drejtave të njeriut, mbrojtjes së mjedisit, qeverisjes së mirë të korporatës dhe përgjegjësisë sociale të korporatës.
Kosova ka arritur progres mbresëlënës në katër vitet e fundit me rritje të qëndrueshme ekonomike mesatarisht 6% të BPV-së dhe asnjëherë nën 4%. Inflacioni ka rënë në mënyrë të vazhdueshme, vitin e kaluar ka rënë në 1.6%, duke kontribuar në një mjedis ekonomik të qëndrueshëm dhe të qëndrueshëm. Ne renditemi në pesë vendet e para me rritjen më të lartë të Investimeve të Huaja Direkte, siç raportohet nga Intelligjenca e FDI Në vitin 2024, ekonomia e Kosovës shënoi për herë të parë një rritje prej afro 50% krahasuar me vitin 2019. Eksportet janë dyfishuar, dhe raporti eksport-import është përmirësuar nga 1:9 në 1:6.
Në një klimë ku shumë demokraci në të gjithë kontinentin tonë kanë përjetuar kriza demokratike në vitet e fundit, Kosova shquhet si vendi më demokratik në rajonin e gjashtë Ballkanit Perëndimor, siç konfirmohet nga Projekti Botëror i Drejtësisë, Transparency International, Freedom House dhe instituti V-Dem.
Në mbyllje, falënderoj nga zemra qeveritë e Islandës, Lihtenshtajnit, Norvegjisë dhe Zvicrës për mbështetjen e palëkundur për vendin tonë.
Ne kemi besim se kjo marrëveshje do të sjellë përfitime të qëndrueshme për bizneset, industritë dhe qytetarët e të gjitha vendeve tona.
Faleminderit dhe urime!
Last modified: 27 Janar, 2025