Prishtinë, 1 nëntor 2009
Në vazhdim po e japim të plotë fjalën e kryeministrit Thaçi
I nderuari President Klinton,
I nderuari President Sejdiu,
I nderuari Kryeparlamentar Krasniqi,
I Nderuari ambasador Dell,
Të nderuar përfaqësues të korit diplomatik,
I nderuar Piter Faith
Zonja dhe zotërinj,
Të dashur qytetarë të Kosovës,
I nderuari President Klinton, mire se erdhët në Shtetin më të Ri në Botë, në Kosovën e pavarur, sovrane, demokratike dhe shumetnike për të cilën aq shumë kontribuuat ju z. President, populli dhe Qeveria Amerikane.
Sot është një ditë e lumtur për te gjithë ne në shtetin e Kosovës.
Sot, po nderojmë mikun e madh të popullit të Kosovës, ish presidentin e Shteteve të Bashkuara të Amerikës dhe simbolin e paqes dhe botës së lirë z. Bill Klinton.
Z. President, na keni bërë nder të jashtëzakonshëm që na u bashkuat në këtë festë të popullit dhe shtetit tonë.
Ju faleminderit që u përgjigjët pozitivisht ftesës sonë.
Festa e sotme është simbol i dashurisë dhe respektit për ju, për popullin dhe kombin amerikan.
Festa e sotme është shenjë e mirënjohjes së thellë nga qytetarët dhe institucionet e Republikës së Kosovës.
Është një motiv i yni për paqe, është frymëzim për liri në kohët që vijnë.
Te nderuar deputet,
Zonja dhe zotërinj,
Shtatorja që do ta zbulojmë sot do të shërbejë si simbol për triumfin e lirisë, triumfin e paqes, triumfin e humanizmit në Kosovë dhe botë.
I nderuari President Klinton,
Ne kujtojmë angazhimin Tuaj ne kohen e luftës sonë për liri, ne kohen kur refugjatët tanë ishin dëbuar dhunshëm nga shtëpitë e tyre jetonin në kushte shumë të vështira.
Ju i nderuari president Klinton bashkuat botën demokratike për lirinë e Kosovës. Ju faleminderit.
Edhe kur kohët dukeshin tepër të zymta Ju na dhatë shpresë, kurajo, besim për të ardhmen tonë.
Me ndihmën Tuaj dhe sakrificën e popullit tone, ne po jetojmë te lire dhe te pavarur në atdheun tonë.
I nderuari President Klinton,
Ne ëndërronim për një të nesërme më të mirë; ne besonim në lirinë dhe pavarësinë tone.
Ne besonim në vlerat perëndimore.
Ëndrrat tona u bënë realitet.
Sot Republika e Kosovës është shtet i lirë, i pavarur, demokratik dhe shumetnik.
Sot Republika e Kosovës ka vizion për integrim në NATO dhe Bashkim Evropian dhe në miqësi të përjetshme me SHBA-të.
Ne bashkërisht e fituam luftën dhe bashkërisht e ndërtuam paqen dhe bashkërisht po e ndërtojmë edhe shtetin e Kosovës.
President Klinton, ju faleminderit për tërë atë që keni bërë për Kosovën, paqen, jetën e lirë, lirinë dhe lumturinë e popullit të Kosovës tonë dhe botës mbarë.
Ne do ta kujtojmë përgjithmonë atë që keni bërë ju për popullin dhe vendit tonë.
President Klinton Ju jeni humanist, jeni lider botëror, i paqes, jeni hero.
Faleminderit shumë
Shteti dhe populli i Kosovës shpreh respektin, krenohet me ju, me SHBA dhe popullin amerikan.
Zoti i bekoftë SHBA
Zoti e bekoftë Shtetin e Kosovës
Zoti u bekoftë Juve i nderuari president
Zoti bekoftë Familjen tuaj
Ju faleminderit!
Last modified: 1 Nëntor, 2009