Prishtinë, 1 gusht 2023
Kryeministri i Republikës së Kosovës, Albin Kurti, sonte për nder të Ditës së Diasporës ka organizuar pritje të veçantë për mërgimtarët në ambientet e “Ballkonit të Hapur të Qeverisë”, i cili tashmë është shndërruar në vend të këndshëm për takime e pritje.
Duke iu uruar mirëseardhje, kryeministri Kurti njoftoi mërgimtarët e pranishëm mbi progresin e dukshëm demokratik e ekonomik të Kosovës të evidentuar nga të gjitha raportet ndërkombëtare kredibile, duke përmendur kështu rritjen mesatare ekonomike, rritjen e të hyrave tatimore, eksportet e investimet e huaja direkte.
Njëkohësisht, rritjen e vendeve të punës, miratimin e ligjit për pagën minimale, e së fundmi edhe ligjin për njohjen e kontributeve të punëtoreve të viteve ’90-ta, kryeministri para mërgimtarëve i cilësoi hapa të rëndësishëm në zhvillimin e Kosovës.
Paralelisht me këto progrese, kryeministri Kurti veçoi se edhe mërgata jonë ka evoluuar dukshëm vit pas viti duke e zgjeruar përfaqësimin tonë kombëtar.
“Atë sot e gjejmë në format më të suksesshme në art, në kulturë, në sport, financa, e tash së fundmi edhe te përfaqësimi politik në shtetet e tyre, nga niveli komunal e deri tek ai qendror. Disa prej tyre janë këtu në mesin tonë sonte”, shtoi kryeministri.
Tutje, ai i prezantoi mërgimtarët edhe me programin për diplomaci publike “Citizen Diplomacy Fellowship”, që ka për qëllim ndërlidhjen me vendin e origjinës përmes angazhimit profesional, si dhe lansimin e platformës “Shijo Kosovën”, përmes së cilës mërgatës, sidomos gjeneratave të reja, i’u mundësohet njohja e vendit me anë të aktiviteteve kulturore, sportive e natyrore.
Gjithashtu, me anë të lehtësimit të procesit të votimit për mërgatën rritet edhe më shumë pjesëmarrja e tyre aktive, derisa në kuadër të investimeve, kryeministri tha se po themelojmë Fondin Sovran me përmes së cilit bashkatdhetarët tanë dëshirojmë t’i bëjmë aksionarë në ekonominë tonë.
Pas gjithë kësaj mbrëmje të frytshme e argëtuese, kryeministri Kurti i lumtur për takimin, falënderoi përzemërsisht gjithë bashkatdhetarët.
Në këtë pritje, ku të ftuar ishin pjesëtarë e figura të ndryshme nga mërgata, artistë, veprimtarë, përfaqësues të shoqatave që veprojnë në mërgatë e përfaqësues të rinj politikë atje, bashkë me kryeministrin ishin të pranishëm edhe ministra e ministre të kabinetit qeveritar dhe zëvendësministra.
Fjala e plotë e Kryeministrit Kurti:
Mirëmbrëma dhe mirë se vini,
Të dashur bashkatdhetarë,
Për rastësi, ose ndoshta edhe jo, nesër bëhen fiks një vit prej se e kemi inauguruar “Ballkonin e Hapur” këtu në Kryeministri. Megjithatë, përvjetorin po e shënojmë sonte sepse ishim pikërisht bashkë, këtu, një vit më parë, prej kur kjo hapësirë e objektit të qeverisë, që dikur nuk shfrytëzohej, është bërë vend kaq i këndshëm për pritje e takime.
E edhe një vit pas, Ballkoni ynë vazhdon të jetë i hapur, sonte, për mërgatën tonë të dashur, për juve bashkatdhetarë. Bashkë e shpallëm. Bashkë po e shënojmë edhe përvjetorin e parë. Bashkë do të takohemi për shumë mote. Mirë se vini e gëzuar! Gëzuar!
Kosova ka bërë përparim të dukshëm gjatë këtyre dy viteve të fundit. Që nga shpallja e pavarësisë përparimi ka qenë i theksuar si për popullin e për shoqërinë poashtu edhe për shtetin edhe institucionet. Ndërkaq, në këto dy vitet e qeverisjes sonë nuk ka raport ndërkombëtar kredibil i cili nuk e ka evidentuar progresin tonë demokratik dhe ekonomik. E sërish kur themi progresin tonë nuk e mendojmë vetën tonë, po e mendojmë edhe një herë popullin e shoqërinë, shtetin e institucionet e tij. Kemi bërë hapa të rëndësishëm në zhvillimin ekonomik, tërheqjen e investimeve të huaja dhe krijimin e vendeve të punës.
Rritja mesatare ekonomike në këto dy vite ka qenë 7.35% të bruto produktit vendor. Të hyrat tatimore janë rritur për 2/3, pa e ndryshuar politikën fiskale dhe eksportet e investimet e huaja direkte janë dyfishuar. Sivjet presim të jetë viti i parë kur eksportet do ta kalojnë shifrën prej 1 miliard euro.
Mesatarisht, gjatë çdo viti të qeverisjes, i kemi shtuar më shumë ekonomisë sonë sesa tri vite marrë së bashku përpara.
Për herë të parë, ekonomia e ka kaluar shifrën prej 400 mijë vendeve aktive të punës. Punësimi ka qenë zotim dhe prioritet i ynë. Kjo është dëshmi që politika dhe masat e shumta të punësimit po funksionojnë.
Miratuam ligjin në Kuvend për rritjen e pagës minimale në Kosovë, pas më shumë se 10 viteve. Tash për punëtorët mbi 35 vjeç kemi rritje të pagës minimale prej 55%, ndërkaq prej atyre që janë nën 35 vjeç është rritja 103%. Me këtë Ligj e kemi larguar edhe tatimin në të ardhurat personale për pagat deri në nivelin e pagës minimale. Për fatin tonë jo të mirë, ky Ligj, sipas vullnetit të opozitës, përfundoi në Gjykatë Kushtetuese dhe duhet ta presim verdiktin e saj.
E javën e kaluar në Kuvend i kemi dhënë fund edhe padrejtësive ndaj pensionistëve që u larguan dhunshëm nga puna gjatë viteve të ‘90-ta. E ndryshimet e bëra në ligj, rreth 70 mijë pensionistë të cilët po të mos ishin larguar dhunshëm nga puna në vitet e ‘90-ta do të arrinin kushtin prej 15 vitesh kontribut deri në 1 janar 1999, tani e tutje, do të marrin pensionin parcial kontributpagues.
Bashkë me Kosovën, edhe mërgata jonë ka evoluuar dukshëm. Nga streha e veprimtarisë së çështjes kombëtare dhe burimi i mbijetesës financiare në kohë të vështira për vendin, ajo vit pas viti po e zgjeron përfaqësimin tonë kombëtar. Atë sot e gjejmë në format më të suksesshme në art, në kulturë, në sport, financa, e tash së fundmi edhe te përfaqësimi politik në shtetet e tyre, nga niveli komunal e deri tek ai qendror. Disa prej tyre janë këtu në mesin tonë sonte.
Mërgata jonë gjithmonë ka qenë e rëndësishme për fatin tonë politik, përpjekjet tona historike për mirëqenien tonë sociale. Çlirimi, shpallja e pavarësisë dhe krijimi e ndërtimi i shtetit të pavarur të Kosovës nuk ka qenë i mundur dhe as i paramenduar pa mërgatën tonë. Sa më shumë që e zhvillojmë shtetin, aq më shumë na forcohen edhe lidhjet. Një shtet i fortë reflektohet edhe një mërgatë më të fuqishme e anasjelltas.
Për të gjitha këto, ne po përpiqemi ta ofrojmë infrastrukturën e nevojshme.
Për forcimin e lidhjeve, qeveria jonë, për herë të parë fillimisht ka zbatuar programin për diplomaci publike “Citizen Diplomacy Fellowship”, për çfarë e falënderoi Zëvendëskryeministren dhe ministren tonë të Punëve të Jashtme dhe Diasporës, zonjën Donika Gërvalla-Schwarz dhe zëvendësen e saj Liza Gashi, e që ka për qëllim ndërlidhjen me vendin e origjinës përmes angazhimit profesional. Ndërkaq pak ditë më parë e lansuam dhe platformën “Shijo Kosovën”, përmes së cilës mërgata, sidomos te gjeneratat e reja, do të ndikojë që të mund ta njohin më mirë vendin e tyre të origjinës përmes aktiviteteve kulturore, sportive e natyrore.
Për pjesëmarrje aktive, kemi miratuar në parim ligjin e ri për zgjedhje që lehtëson pjesëmarrjen e mërgatës tonë, procesin e votimit për mërgatën, duke mundësuar votimin edhe në ambasada e në konsullata dhe gjithashtu edhe votimin me postë brenda shtetit ku jetojnë bashkatdhetarët tanë, përveç asaj mundësisë që të votojnë me postë direkt në Kosovë ose edhe të vijnë në Kosovë atëherë kur mbahen zgjedhjet.
Për investime, po e themelojmë Fondin Sovran për të cilin për herë të parë kemi folur para gjashtë vjetëve, nëpërmjet të cilit synojmë ta bëjmë indeksimin e kompanive tona publike po edhe private në ekonominë e vendit dhe dëshirojmë që edhe bashkatdhetarët t’i bëjmë aksionarë në ekonominë tonë.
Ne e dimë që katragjyshet tona e katragjyshërit tanë e kanë definuar pasurinë si tokë dhe shtëpi. Mirëpo në shekullin XXI do të duhej që të mendojmë për aksionet e kompanive tona të cilët indeksohen në bursë në treg të kapitalit, e pikërisht këtë gjë e mundëson Fondi Sovran i cili na i shpëton 42 mijë hektarë tokë bujqësore nga ndërtimet e egra dhe tjetërsimet e tjera. Po gjithashtu edhe 17 ndërmarrjet publike i vendos në një çati për çfarë na nevojitet mbështetja e mërgatës për një bord profesional dhe për një kryeshef i cili zgjidhet për një mandat më të gjatë se sa ciklet elektorale katërvjeçare që janë tek ne.
Ju e dini që në Kosovë mund të blesh bono të thesarit, por nuk mund t’i shesësh ato. Ne kemi nevojë ta bëjmë më dinamike ekonominë tonë dhe kursimet e bashkatdhetarëve tanë të mos shndërrohen thjesht në pronësi që është gati kapital i vdekur sepse shfrytëzohet dy javë në vit, si banesë në Prishtinë për shembull, por të vijë dita që bashkatdhetari ynë në vend se ta blejë ndoshta edhe një banesë në Prishtinë, t’i blejë 0.1% të aksioneve në Trepçë, ose në KEK, ose në Telekom e kështu me radhë.
Pra, ne duam që t’ju ftojmë juve që, jo të kontribuoni duke sakrifikuar, por të fitoni edhe ju duke investuar.
Mirë se vini edhe një herë e gëzohem fort që po takohemi!
Last modified: 2 Gusht, 2023