Prishtinë, 7 Dhjetor 2008
Kryeministri i Qeverisë së Republikës së Kosovës, Hashim Thaçi, përgëzon kryetarin e Bashkësisë Islame të Kosovës, myftiun Naim Tërrnava dhe besimtarët islamë, me rastin e Kurban Bajramit. Në mesazh thuhet:
I nderuari z. Tërrnava,
Të nderuar besimtarë,
Kam nderin dhe kënaqësinë që në emër të Qeverisë së Republikës së Kosovës dhe në emrin tim t’Ju uroj festën e Kurban Bajramit.
Kjo festë na ngjall ndjenjën dhe idenë e përkushtimit dhe të sakrificës për të mirën e njerëzimit, nevojën shpirtërore të lartësimit moral dhe të kultivimit të vlerave të larta në shoqëri.
Kjo festë Kosovën e gjen të lirë, demokratike dhe në përpjekje për t’u zhvilluar në të gjitha drejtimet. Kosova është shtet i ri, paqësor dhe me vullnet të plotë për t’u bërë pjesë e botës së përparuar.
Festa e Kurban Bajramit le të jetë edhe një rast për t’u shpalosur më shumë, më gjerë dhe më thellë ndjenjat e dashurisë, respektit, harmonisë dhe vullnetit të mirë të qytetarëve tanë.
Uroj që ditët e Kurban Bajramit në familjet tuaja të sjellin më shumë lumturi, paqe dhe mbarësi.
Hashim Thaçi,
Kryeministër i Qeverisë së Republikës së Kosovës
