Prishtinë, 19.8.2009
Duke u përgjigjur interesimit të gazetarëve lidhur me pohimet për një memorandum midis EULEX-i dhe Serbisë, Kryeministri Hashim Thaçi ka thënë se Kosova është shtet i pavarur, sovran dhe demokratik, ka institucionet e saj demokratike të zgjedhur në mënyrë legale me përgjegjësi të plotë dhe vullnet të qytetarëve të Kosovës.
Në vazhdim po japim deklaratën e kryeministrit Hashim Thaçi:
Vendimet e institucioneve të Kosovës kanë qenë dhe do të jenë edhe sot edhe në të ardhmen autonome. Për Kosovën vendosin institucionet e Republikës së Kosovës. Ne do të respektojmë Kushtetutën, do të respektojmë institucionet e Kosovës. Ato janë të vetmet që kanë autoritet ekzekutiv në Kosovë.
Respektojmë edhe dokumentin Ahtisari të cilën jemi duke e implementuar. Do të vazhdojmë të ndërtojmë raporte të mira me të gjitha vendet fqinje, duke përfshirë edhe Serbinë. Këtë autoritet e kanë institucionet e Kosovës. Pra do të ndërtojmë raporte të mira me gjitha vendet e rajonit.
Institucionet e Kosovës janë të vetmet që kanë autoritet ekzekutiv në Kosovë në raportet bilaterale.
