Prishtinë, 6 tetor 2025
Kryeministri në detyrë i Republikës së Kosovës, Albin Kurti, mori pjesë në hapjen e punëtorisë me të gjithë inspektorët e arsimit me temë “Praktikat e mira për inspektim efektiv”, organizuar nga Ministria e Arsimit, Shkencës, Teknologjisë dhe Inovacionit.
Në fjalën hyrëse, kryeministri Kurti tha se është kënaqësi të jetë në mesin e profesionistëve që mbikëqyrin cilësinë e arsimit tonë, që ruajnë standardin dhe ndihmojnë përmirësimin e mëtejmë, për të vlerësuar përpjekjet për ngritjen e cilësisë në arsim, edhe për të rikonfirmuar që arsimimi dhe edukimi i brezave të rinj është prioritet qeveritar e shtetëror i yni.
Ai ka kujtuar se për një periudhë të gjatë kohore, Inspektorati i Arsimit ka funksionuar me vetëm 25 inspektorë, numër ky siç tha kryeministri, nuk përkon as afër me numrin e institucioneve arsimore, kopshteve e çerdheve. “Megjithëkëtë, edhe përballë këtij realiteti sfidues, me përkushtim, ju keni mbajtur funksionimin e një prej mekanizmave më të rëndësishëm të sistemit arsimor. E për këtë, ju shpreh vlerësimin dhe mirënjohjen time, të gjithëve, secilës e secilit”, tha ai, duke shtuar se përpjekjet e Qeverisë sonë dhe të Ministrisë së Arsimit, Shkencës, Teknologjisë dhe Inovacionit për forcimin e kapaciteteve të inspektoratit arsimor nuk janë ndalur asnjëherë. Si rezultat i këtij angazhimi, ai theksoi se kemi pranuar 22 inspektorë të rinj që do t’i japin sistemit tonë arsimor më shumë mbështetje dhe prani në terren.
Më tej, kryeministri tha se gjatë këtyre viteve kemi investuar në mënyrë të vazhdueshme dhe strategjike në sektorin e arsimit, në ndërtimin dhe renovimin e shkollave dhe çerdheve, në pajisjen e tyre me infrastrukturë moderne dhe në zhvillimin profesional të mësimdhënësve, duke krijuar kështu kushte më të mira, që shkollat të ofrojnë cilësi, përgatitje të lartë dhe mirëqenie për çdo nxënës.
“Të gjitha këto investime janë edhe në favor të punës suaj si Inspektorat i Arsimit. Sa më i fortë të jetë themeli i sistemit arsimor, aq më e lehtë bëhet puna e inspektimit dhe aq më pak ndërhyrje do të jenë të nevojshme. Kur standardet ngrihen dhe kushtet përmirësohen, kontrolli shndërrohet në partneritet dhe mbikëqyrja bëhet garanci si për cilësi ashtu edhe për efikasitet”, tha ai.
Duke nënvizuar se inspektimi nuk është detyrë e lehtë, por një mision fisnik që kërkon profesionalizëm, ndershmëri dhe përgjegjësi, kryeministri theksoi mbështetjen e Qeverisë me trajnime cilësore, me përmirësim të kushteve të punës dhe me vlerësimin që e meritoni.
Ministrja në detyrë e Arsimit, Shkencës, Teknologjisë dhe Inovacionit, Arbërie Nagavci, tha se është ofruar mbështetje e plotë në realizimin e misionit dhe synimit të përbashkët për përmirësimin e cilësisë në arsim, meqenëse Inspektorati i Arsimit është shtylla kryesore e zbatimit të politikave arsimore dhe garantuesi i respektimit të standardeve në institucionet tona arsimore.
“E konsiderojmë si arritje shumë të rëndësishme rritjen e numrit të inspektorëve në gjithë sektorët e Inspektoratit të Arsimit në Republikën e Kosovës. Nga 25 inspektorë sa ishin gjithsej në Republikën e Kosovës, tani pothuajse kemi arritur ta dyfishojmë atë numër, duke arritur në 47 dhe si Qeveri kemi ndarë buxhetin dhe kemi bërë planifikimet për punësimin edhe të 20 inspektorëve të rinj”, tha ministrja Nagavci.
Fjala e plotë e kryeministrit Kurti:
E nderuar ministre në detyrë, znj. Arbërie Nagavci,
Të nderuar znj. Besa Bytyçi-Baraliu, drejtore e përgjithshme e Inspektoratit të Arsimit,
Të nderuar inspektorë dhe inspektore të arsimit,
Është kënaqësi të jem sot këtu me ju, me profesionistë që mbikëqyrin cilësinë e arsimit tonë, që ruajnë standardin dhe ndihmojnë përmirësimin e mëtejmë. Jemi këtu së bashku, për të vlerësuar përpjekjet tona për ngritjen e cilësisë në arsim, edhe për të rikonfirmuar që arsimimi dhe edukimi i brezave të rinj është prioritet qeveritar e shtetëror i yni.
Kujtojmë, se për një periudhë të gjatë kohore, Inspektorati i Arsimit ka funksionuar me vetëm 25 inspektorë. Një numër që nuk përkon as afër me numrin e institucioneve arsimore, kopshteve e çerdheve, pra nuk përkon me rëndësinë dhe barrën që ka ky institucion. Megjithëkëtë, edhe përballë këtij realiteti sfidues, me përkushtim, ju keni mbajtur funksionimin e një prej mekanizmave më të rëndësishëm të sistemit arsimor. E për këtë, ju shpreh vlerësimin dhe mirënjohjen time, të gjithëve, secilës e secilit.
Përpjekjet e Qeverisë sonë dhe të Ministrisë së Arsimit, Shkencës, Teknologjisë dhe Inovacionit për forcimin e kapaciteteve të inspektoratit arsimor nuk janë ndalur asnjëherë. Si rezultat i këtij angazhimi, kemi pranuar 22 inspektorë të rinj që do t’i japin sistemit tonë arsimor më shumë mbështetje dhe prani në terren.
Gjatë këtyre viteve kemi investuar në mënyrë të vazhdueshme dhe strategjike në sektorin e arsimit, në ndërtimin dhe renovimin e shkollave dhe çerdheve, në pajisjen e tyre me infrastrukturë moderne, dhe në zhvillimin profesional të mësimdhënësve. Kemi krijuar kushte më të mira, që shkollat të ofrojnë cilësi, përgatitje të lartë dhe mirëqenie për çdo nxënës.
Të gjitha këto investime janë edhe në favor të punës suaj si Inspektorat i Arsimit. Sa më i fortë të jetë themeli i sistemit arsimor, aq më e lehtë bëhet puna e inspektimit dhe aq më pak ndërhyrje do të jenë të nevojshme.
Kur standardet ngrihen dhe kushtet përmirësohen, kontrolli shndërrohet në partneritet dhe mbikëqyrja bëhet garanci si për cilësi ashtu edhe për efikasitet. Kur themeli është i fortë, ndërtesa qëndron vetë.
Roli i Inspektoratit natyrisht nuk është të ndëshkojë, por të udhëzojë, të këshillojë dhe t’i përkrahë institucionet arsimore në rrugën e përmirësimit të vazhdueshëm e të pandalshëm. Qëllimi juaj nuk është të krijoni frikë, por të siguroni standarde dhe të nxisni përparim. Ju jeni bashkëpunëtorë të mësimdhënësve dhe aleatë të drejtuesve të shkollave, jeni bashkudhëtarë në rrugëtimin për cilësi dhe efikasitet.
E dimë mirë se inspektimi nuk është detyrë e lehtë. Kërkon profesionalizëm, ndershmëri dhe përgjegjësi. Por, në këtë mision fisnik, ju nuk jeni vetëm. Qeveria do të vazhdojë të mbështesë me trajnime cilësore, me përmirësim të kushteve të punës dhe me vlerësimin që e meritoni. Sistemi arsimor dhe përparimi në arsim varet shumë prej institucionit tuaj që ju e përbëni. Sikur cilësia e mësimnxënies ashtu edhe efikasiteti i mësimdhënies varen në masë të konsiderueshme prej punës dhe prej angazhimit tuaj. Por, do të shkojë edhe një hap më tej. Kureshtja për dijen, pasioni për shkencat dhe artet, lulëzimi i këtyre, po ashtu varet nga puna juaj, nga puna jonë e përbashkët.
Andaj të dashur inspektorë,
Puna juaj e dimë që është shpesh e heshtur, por ndikimi i saj ndihet në çdo klasë, dhe në çdo shkollë të vendit. Për punën tuaj do të flasin brezat që do ta vijnë. Qeveria është, dhe do të mbetet përherë në krahun tuaj, duke ecur bashkë në këtë rrugëtim për arsim më të drejtë, më të mirë, më cilësor e edhe më njerëzor. Së bashku do të vazhdojmë punën për shkolla më të forta dhe për të ardhme më të ndritur për fëmijët e Republikës së Kosovës.
Faleminderit shumë për kontributin tuaj të çmuar, për përkushtimin ndaj gjeneratave të reja dhe për besimin tuaj në misionin fisnik të arsimit.
Ju faleminderit të gjithëve!
