Prishtinë, 10 nëntor 2009
Kryeministri i Republikës së Kosovës, Hashim Thaçi ka pritur sot në një takim përfaqësuesit e Rrjetit Evropian të Organizatave për Monitorimin e Zgjedhjeve (ENEMO), të kryesuar nga z.Darko Aleksov.
Në takim është diskutuar për mbarëvajtjen e procesit zgjedhor të 15 nëntorit, me theks të veçantë për rëndësinë e madhe që kanë këto zgjedhje për të ardhmen demokratike të shtetit të Kosovës.
Kryeministri i Republikës së Kosovës, Hashim Thaçi ritheksoi përkushtimin e Qeverisë së Republikës së Kosovës dhe të gjitha institucioneve të vendit për mbajtjen e zgjedhjeve të lira, fer dhe demokratike, me pjesëmarrjen e të gjitha komuniteteve.
Kryeministri Hashim Thaçi me këtë rast falënderoi përfaqësuesit e Rrjetit Evropian të Organizatave për Monitorimin e Zgjedhjeve (ENEMO), për gatishmërinë dhe anagazhimin për monitorimin e procesit zgjedhor të 15 nëntorit, duke qenë i bindur në raportimin korrekt dhe profesional të zgjedhjeve nga ana e këtij misioni monitorues.
Pas shpalljes së pavarësisë së Kosovës, zgjedhjet lokale të 15 nëntorit, janë momenti më i rëndësishëm historik për Kosovën. Suksesi i plotë i tyre do të reflektojë për të mirën e vendit në procesin e vazhdimit të njohjeve për pavarësinë e Kosovës, si dhe në procesin e integrimit në strukturat euroatlantike, – u shpreh kryeministri Thaçi.
