Prishtinë, 28 korrik 2021
Kryeministri i Republikës së Kosovës, Albin Kurti, i ka dërguar letër ngushëllimi Kancelares gjermane, Angela Merkel, pas vërshimeve shkatërruese në disa shtete federale të Gjermanisë.
Kryeministri Kurti ia ka shprehur ngushëllimet më të përzemërta për humbjet e jetëve dhe dëmet materiale që pësoi gjatë vërshimeve.
Ai ka shprehur solidarizimin e Qeverisë dhe popullit të Kosovës me popullin gjerman dhe e ka falënderuar Gjermaninë për ndihmën që i ka dhënë Kosovës në kohë të vështira.
Letra e plotë e Kryeministrit Kurti:
E nderuara Kancelare Merkel,
I kam pranuar me shumë dhimbje lajmet për vërshimet shkatërruese në disa shtete federale të Gjermanisë.
Teksa populli i Gjermanisë është duke u rikuperuar nga kjo fatkeqësi tragjike natyrore, dua të shpreh ngushëllimet më të përzemërta për Ju dhe të gjithë ata që pësuan humbje jetësh e dëme materiale.
Në emër të Qeverisë së Republikës së Kosovës dhe popullit tonë, pranoni ngushëllimet më të sinqerta për familjet e viktimave dhe për popullin e Republikës Federale të Gjermanisë.
Jemi përgjithmonë mirënjohës ndaj Gjermanisë që ua hapi dyert dhe zemrat refugjatëve nga Kosova, në kohë shumë të vështira. Lidhja ndërmjet dy popujve mbetet e fortë. Kosova solidarizohet me Ju në këto ditë të vështira.
Ju uroj forcë të gjitha familjeve që janë në zi dhe rikuperim të shpejtë e të plotë të gjitha rajoneve të prekura.
I juaji me shumë sinqeritet dhe respekt,
Albin Kurti
Kryeministër i Republikës së Kosovës
