Bruksel, 23 shkurt 2022
Gjatë qëndrimit në Bruksel, për raundin e dialogut Kosovë-Serbi, Zëvendëskryeministri i Republikës së Kosovës për Integrim Evropian, Zhvillim dhe Dialog, Besnik Bislimi, u takua me Komisionerin për Zgjerim të Bashkimit Evropian, z.Oliver Varhelyi.
Në takim u diskutua mbi fushat me rëndësi në lidhje me procesin e integrimit të Kosovës në Bashkimin Evropian. U garantua mbështetja në lidhje me fushën e energjisë dhe tranzicionit drejt energjisë së gjelbër. Gjithashtu u fol dhe për përkrahjen e BE-së në reformën për administratën publike dhe mundësinë e mbështetjes teknike në kuadër të këtij procesi. U vlerësua angazhimi në fushën e sundimit të ligjit, dhe u ritheksuan progreset e Kosovës në këtë drejtim.
Gjithashtu u fol dhe për projekte potenciale që do përfshihen në kuadër të mekanizmit të Instrumentit të Para-Anëtarësimit (IPA III) dhe për mundësitë e rritjes së bashkëpunimit përmes ndihmës financiare dhe ekspertizës që Bashkimi Evropian mund të ofrojë për Kosovën në rrugëtimin e saj drejt BE-së.
Last modified: 23 Shkurt, 2022