Prishtinë, 10 dhjetor 2014
Ministrja për dialogun Edita Tahiri ka pritur sot Ambasadoren e Belgjikës në Sofie, Anick Van Calster dhe të ngarkuarin me punë të Ambasadës belge në Kosovë, Jean-Francois Brackman.
Në takim është biseduar për prioritetet e Qeverisë së re të Kosovës dhe angazhimet për forcimin e mëtejmë të marrëdhënieve bilaterale mes dy vendeve, si dhe për procesin e dialogut të Brukselit.
Ministrja Tahiri ka theksuar se formimi i institucioneve të reja dje, që dolën nga zgjedhjet demokratike të këtij viti, ka hapur një kapitull të ri për qeverisjen e vendit i cili do të angazhohet fuqishëm për një shtet euroatlantik të Kosovës në interes të qytetarëve dhe komuniteteve. Ajo konfirmoi se Qeveria e re në programin e saj ka si një ndër prioritetet dialogun e Brukselit në kuadër të politikave për integrime evropiane, fqinjësi të mirë dhe stabilitet rajonal. Ajo po ashtu foli për rezultatet dhe sfidat e procesit të implementimit duke thënë që pret intensifikimin e dialogut të Brukselit.
Ambasadorja e Belgjikës Anick Van Calster shprehu urimet për krijimin e Qeverisë së re duke rikonfirmuar se Belgjika do të vazhdoj angazhimet për thellimin e marrëdhënieve dypalëshe dhe do të mbështesë perspektivën evropiane të Kosovës. Ajo vlerësoi të rëndësishëm vazhdimin dhe përkushtimin për dialogun e Brukselit për fqinjësi të mirë me Serbinë si një kontribut për paqen në rajon.
Last modified: 10 Dhjetor, 2014