Prishtinë, 17 tetor 2022
Kryeministri i Republikës së Kosovës, Albin Kurti takoi sot anëtarët e Bordit të Odës Ekonomike Amerikane.
Kjo Odë Ekonomike ka 230 kompani anëtare të cilat realizojnë një qarkullim prej 4 miliardë Euro në vit dhe punësojnë mbi 35 mijë punëtorë.
Sektori privat është kontribues kryesor në buxhetin e shtetit dhe shtyllë e zhvillimit ekonomik dhe shoqëror të vendit. Gjatë takimit u diskutua rëndësia e dialogut publiko-privat për zhvillimin ekonomik të vendit, dhe masat që mund të ndërmerren për promovimin e investimeve të huaja dhe atyre vendore në Kosovë.
U theksua rëndësia e edukimit në zhvillimin e gjithmbarshëm të vendit si dhe kontributi që mund të japë sektori privat dhe diaspora në fushat e ndryshme ku sektori publik ballafaqohet me mungesë të kapaciteteve të mjaftueshme njerëzore.
Kryeministri Kurti shprehu gatishmërinë dhe interesimin e qeverisë për të thelluar dialogun publiko-privat dhe për të bashkëpunuar me Odën Ekonomike Amerikane në funksion të zhvillimit ekonomik të vendit.
Last modified: 17 Tetor, 2022