Gjakovë, 12 gusht 2022
Kryeministri i Republikës së Kosovës, Albin Kurti dhe ministri i Financave, Punës dhe Transfereve, Hekuran Murati, vizituan sot fabrikën e prodhimit të metaleve “Rroni Fer” në Gjakovë.
Rronifer është një nga përfituesit nga subvencionimi i kredive investive, si pjesë e masës 2.1 të Pakos së Ringjalljes Ekonomike. Si rezultat i mbështetjes së ofruar, kompania në fjalë ka arritur të zgjerojë kapacitetet prodhuese me makineri zvicerane dhe bashkëkohore, të cilat garantojnë cilësi dhe rritje të prodhimit.
Pas vizitës, kryeministri Kurti u shpreh se kompania Rroni Fer është shembull i suksesit dhe i ndikimit të masës 2.1 – Subvencionimi i kredive investive në zhvillimin e kapaciteteve të bizneseve prodhuese dhe rritjen e punësimit e eksportit. Ai shtoi se në dy vitet e fundit kompania ka trefishuar numrin e punëtorëve duke e ngritur atë në 200 sosh dhe planifikojnë që këtë trend ta vazhdojë edhe në të ardhmen.
“Nëpërmjet Pakos së Ringjalljes Ekonomike, Qeveria e Kosova e ka ndihmuar Rronifer-in me 360 mijë euro. Kjo kompani eksporton në vendet e rajonin dhe ato të Evropës perëndimore, që është synimi i tyre kryesor. Aktualisht rreth 50% të prodhimit të tyre është për eksport”, potencoi kryeministri Kurti.
Ministri Murati, në anën e tij, u shpreh se mbështetja ndaj prodhuesve vendorë është tejet e rëndësishme për zhvillimin ekonomik të vendit, andaj Ministria e Financave, Punës dhe Trasfereve edhe më tej do të vazhdojë punën në këtë drejtim.
Në fund, duke ritheksuar ndikimin e mbështetjes në rritjen e kapaciteteve të kompanisë së tyre dhe avancimin e pozitës në treg, nikoqirët falënderuan kryeministrin Kurti dhe ministrin Murati për vizitën e tyre dhe mbështetjen e qeverisë.
Last modified: 12 Gusht, 2022